Elordada saýda, oiyn-saýyq ortalyqtary men men saýda úileriniń senbi kúnderi jumysqa daiyndyǵy tekserildi, dep habarlaidy "Ult aqparat".
Investitsiialar jáne kásipkerlikti damytý basqarmasy, aýdan ákimdikteri men Sanitarlyq-epidemiologiialyq qadaǵalaý departamenti ókilderi birqatar iri saýda nysandarynda - «Jannur» saýda úiinde, «Ásem» bazarynda, «Kerýen», «Aziia Park» saýda, oiyn-saýyq ortalyqtarynda jáne taǵy basqalarynda monitoring júrgizdi.
«Monitoring kórsetkendei, barlyq nysandar senbi kúni jumys isteýge daiyn, olar bas sanitarlyq dárigerdiń barlyq qajetti talaptaryn oryndaǵan», - dedi Investitsiialar jáne kásipkerlikti damytý basqarmasy basshysy Rýslan Ydyrysov.
Esterińizge sala keteiik, jańa qaýlyǵa sáikes, elordadaǵy saýda úileri, saýda, oiyn-saýyq ortalyqtary senbide saǵat 09:00-den 20:00-ge deiin jumys isteitin bolady. Jeksenbi kúndergi jumysyna engizilgen tyiym saqtalady. Kelýshiler maska taǵýy, áleýmettik qashyqtyqty saqtaýy, termometriiadan ótip, antiseptikter men sanitaizer qoldanýǵa mindetti.
«Eger mobildi toptar saýda, oiyn-saýyq ortalyqtarynda shekteý sharalary men karantin talaptary buzylǵanyn anyqtasa, onda ruqsat alynyp tastalady jáne olar senbide jumys istemeidi. Kelýshiler maska taǵýy kerek, termometriia qajet, zaldarda – antiseptikter, sanitaizerler bolýy tiis. Ár býtikte qashyqtyq saqtalýy, ár adamǵa tórt sharshy metr bólinýi kerek. Kelýshiler sany 30% aspaýy qajet», - dedi Baiqońyr aýdandyq taýarlar men kórsetiletin qyzmetter sapasy men qaýipsizdigin baqylaý basqarmasy basshysynyń orynbasary Saltanat Iklasova.
Saýda oryndarynda ornalasqan sulýlyq salondaryna, atelelerge, himiialyq tazartý oryndaryna, shashtarazdarǵa, aiaq kiim jóndeý sheberhanalaryna jańa keste engizildi. Atalǵan kásipkerlik sýbektileri barlyq sanitarlyq erejelerdi qatań saqtai otyryp, senbi men jeksenbi kúnderi 09:00-den 20:00-ge deiin jumys istei alady.
