Ákimdiktiń mobildi toby politseilermen jáne epidemiologtarmen birlesip, kúndelikti kásiporyndardaǵy sanitarlyq normalardyń saqtalýyn qadaǵalaityn reid júrgizedi. Bul jóninde qala ákimdiginiń resmi saity habarlady.
Reid barysynda qonaq úiler, bazarlar, meiramhanalar men dámhanalar jáne basqa da kópshilik oryndar tekserildi.
«Búgingi tańda biz elordalyq bas sanitar dáriger qaýlysynyń saqtalýyna monitoring júrgizýdemiz. Osy ýaqyt aralyǵynda Saryarqa aýdanyndaǵy 300 nysanǵa monitoring júrgizildi. Onyń ishinde 100 nysanda sanitarlyq sharalar saqtamaǵan. Nysandar bul olqylyqty túzetkenge deiin jabyldy. Kásipkerlerge túsindirý júrgizildi. Nysandar sannormalardy qatań saqtaýǵa mindetti: kire beriste sanitaizerler (antiseptik) bolýy tiis, qyzmetkerler men klientter betperde kiiýi kerek. Sondai-aq ústel arasyndaǵy 2 metr qashyqtyqty saqtaýdy qamtamasyz etý mańyzdy. Kelýshiler maska taǵyp júrýi qajet»,-dep atap ótti Saryarqa aýdandyq taýarlar men kórsetiletin qyzmetterdiń sapasy men qaýipsizdigin baqylaý departamenti sanitarlyq-gigienalyq qadaǵalaý bólimi basshysynyń mindetin atqarýshy Damira Nuran.
Eger kelýshi joǵaryda atalǵan erejelerdiń saqtamalmaǵanyn baiqasa, 109 nómirine habarlasýǵa nemese taýarlar men kórsetiletin qyzmetterdiń sapasy men qaýipsizdigin baqylaý basqarmasynyń kez kelgen bólimshesine shaǵymdana alady.
«Barlyq jaýapkershilikti sezinip, sannormalardy saqtaityn azamattar bar. Alaida, ony elemeitinder de kezdesedi. Biz jetkilikti mólsherde antiseptik satyp aldyq. Kire beriste qonaqtar men qyzmetkerler qolyn óńdei alady. Barlyq jerde jeldetý júiesi qondyrylǵan. Barlyq qural-jabdyqtar, onyń ishinde ústelder men oryndyqtar arnaiy suiyqtyqpen óńdeledi», - deidi «Izbýshka» ashanasynyń ákimshisi Gúljaýhar Biǵalieva.
Kásipkerler sanitarlyq normalardy qatań saqtaýy tiis, óitkeni indetti juqtyrý qaýpi áli de saqtalady. Sanitarlyq normalar saqtalmaǵan jaǵdaida, nysandar óz jumysyn toqtatady.
