Elordada sán salondaryna tek shashtaraz qyzmetin bastaýǵa ruqsat etiledi. Shashtaraz qyzmeti de belgili bir talaptar sheńberinde kórsetilýi tiis, dep habarlaidy "Ult aqparat".
«Qazirgi karantin jaǵdaiynda kósheler men qoǵamdyq oryndardyń, saiabaqtardyń bári de aldyn alý maqsatynda dezinfektsiialanady. Saiabaqtar qazir ashyldy. Onda úsh adamnan artyq júrmeýge keńes beremiz. Al otbasymen bolsa júrýge bolady. Adamdar 1-2 metr qashyqtyqty saqtap júrýi kerek. Sondyqtan saiabaqta kisi kóp bolsa, mindetti túrde maska kiiý kerek. Siz óz densaýlyǵyńyzdy saqtaý úshin osy talaptardy saqtaýǵa mindettisiz. Saiabaqta jalǵyz ózińiz júrseńiz kimeýge bolady», - dedi qalalyq taýarlar men kórsetiletin qyzmetterdiń sapasy men qaýipsizdigin baqylaý departamentiniń tehnikalyq reglamentterdi baqylaý bólimniń basshysy Qarlyǵash Ábdisheva qala ákimdiginiń Facebook paraqshasynda ótken onlain rejimdegi baspasóz máslihatynda.
Onyń aitýynsha, qaladaǵy iri oiyn-saýyq jáne saýda ortalyqtary áli ashylmaǵan.
«Qazir ondaǵy tek azyq-túlik satatyn sýpermarketter men dárihanalar jumys istep tur. Osy ekeýinen basqa saýda núkteleri jumysyn bastamaýy kerek. Sán salondarynyń tek shashtaraz qyzmetteri ǵana jumys isteidi. Kosmetikalyq, manikiýr nemese pedikiýr qyzmetterin kórsetýge tyiym salynady. Shashtaraz qyzmeti tek maska kiip kórsetilýi tiis. Klientke de, sheberge de osy talap ortaq. Kezek bolmaýy tiis. Aldyn ala jazylyp qana jumys júrgizýge bolady», - dedi ol.
