Astana politseileri azamattardy ýniversitetke grantqa oqýǵa túsiremin dep aldaǵan alaiaqty qolǵa túsirdi, dep habarlaidy "Ult aqparat" Nur-Sultan qalalyq Politsiia departamentiniń baspasóz qyzmetine silteme jasap.
Politsiiaǵa elorda turǵyny aryzdanǵan. Áieldiń aitýynsha, onyń tanysy Nur-Sultan qalasyndaǵy meditsinalyq ýniversitetke oqý grantyn alyp beremin dep ýáde berip, 2,5 mln teńge syiaqy suraǵan.
Aqshany qolyna alǵan soń bailanysty siretip, keiin múldem habarsyz ketken.
Keiinirek, ýáde etilgen grant alaiaqtyń arbaýy ekenin túsingen áiel politsiiaǵa júgindi.
Politsiia qyzmetkerleri jedel-izdeý sharalary kezinde kúdiktini qolǵa túsirdi. Ol 33 jastaǵy qala turǵyny bolyp shyqty. Er adam kinásin tolyǵymen moiyndap, aqshany qajetine jumsap úlgergenin aitqan.
Osy fakt boiynsha QR QK 190-baby («alaiaqtyq») boiynsha sotqa deiingi tergeý júrip jatyr. Onyń osy sekildi ózge de qylmystarǵa qatysy bar-joǵy tekserilip jatyr.
