Elordada politseiler volonterlermen birge reid júrgizip, meditsinalyq zattardyń zańsyz satylý faktilerin anyqtady. Quqyq buzýshylardan 188 meditsinalyq betperde jáne 112 antiseptik tárkilendi, dep habarlaidy qala ákimdiginiń resmi saity.
Elordalyq Politsiia departamentiniń qyzmetkerleri tótenshe jaǵdai men karantin talaptarynyń oryndalýy boiynsha shaǵyn jáne orta biznes qyzmetine tekserý júrgizdi. Qazirgi ýaqytta politsiia qyzmetkerlerine 235 erikti kómek kórsetedi, olar baqylaý beketterindegi, reid kezindegi jumystarǵa tartylǵan.
«Elordada karantin rejimi jariialanǵanda volonterler politseilerge kómekke keldi. Olardyń árqaisysy azamattyq ustanymyn kórsetip, bizben birge jumys isteýdi óziniń mindeti dep sanaidy. Biz olardyń usynystaryn qýana qabyldadyq. Biz birlesip, koronavirýstyń taralýyna qarsy tura alamyz. Bolashaqta eriktilermen birlesken jumys tájiribesin qoldana alamyz dep úmittenemiz», - dedi elordanyń bas politseii Erjan Sádenov.
Tekseris barysynda eldegi tótenshe jaǵdaiǵa qaramastan, qaladaǵy birqatar uiymdardyń shtattyq rejimde jumys istegeni belgili boldy. Máselen, «Tulpar» saýda ortalyǵynda avtojýý, «Tapchan-7» dámhanasy, «Doner Miks» qoǵamdyq tamaqtaný orny, «Jiger» biliard klýby jáne basqa da uiymdar jumystaryn jalǵastyra bergen. Rejimdi buzǵan menshik ieleri, shaǵyn jáne orta biznes sýbektilerine ákimshilik hattamalar toltyryldy. Atalǵan zańbuzýshylyqtar týraly materialdardy elordanyń mamandandyrylǵan aýdanaralyq ákimshilik soty beinekonferentsiia rejiminde qarastyrǵanyn atap ótken jón.
Barlyq mekeme ielerine 10 AEK mólsherinde ákimshilik aiyppul salyndy. Sonymen qatar reid kezinde ýchaskelik politsiia inspektorlary eriktilermen birge meditsinalyq maskalar men antiseptikterdi satýdyń zańsyz jaǵdailaryn anyqtady. Quqyqbuzýshylardan 188 betperde jáne 112 dana antiseptikter tárkilendi. Satýshylarǵa ákimshilik hattama toltyryldy.
