Jaqynda anasynan aiyrylǵan telejúrgizýshi Anna Danchenko aýyr sátte qoldaý kórsetken prodiýser Baian Maqsatqyzyna rizashylyǵyn bildirdi, dep habarlaidy ult.kz.
Annanyń aitýynsha, Baian Maqsatqyzy qaraly kúnderi oǵan moraldyq qana emes, materialdyq turǵydan da kómek qolyn sozǵan. Prodiýser jerleý rásimine ketetin shyǵyndy eskerip, qomaqty qarajat aýdarǵan.
"Ómirimdegi eń aýyr kezeńderdiń birinde kórsetken janashyrlyǵyńyz ben qamqorlyǵyńyz úshin shyn júrekten alǵys aitamyn. Ekeýmiz uzaq ýaqyt birge jumys istemesek te, sizdiń adami qasietterińizdi árdaiym baǵalaitynmyn. Al dál qazir ony burynǵydan da tereń sezindim", – dep jazdy Anna Danchenko.
Telejúrgizýshi kútpegen jerden kórsetilgen mundai qoldaýdyń ózin erekshe tolqytqanyn jasyrmady. Onyń sózinshe, Baian Maqsatqyzynan qomaqty qarajat túskenin kórgende kózine jas alǵan.
"Aqsha úshin emes, sizden mundai qamqorlyqty múlde kútpegendikten jyladym. Men eshqashan ózgeden kómek kútýdi nemese suraýdy ádetke ainaldyrǵan emespin. Ata-anam bala kezimnen qiyndyqtardy óz kúshimmen eńserýge úiretti. Sondyqtan bul áreketińiz júregime qatty áser etti. Keide bir ǵana is adamnyń júregi týraly myńdaǵan sózden artyq aitady", – dedi ol.
Anna Danchenko jaqynynan aiyrylǵannan keiin ainalasyndaǵy adamdardyń shynaiy janashyrlyǵy men meiiriminiń qadirin burynǵydan da tereń túsine bastaǵanyn jetkizdi.
Aita keteiik, Anna Danchenko anasynyń qazasynan keiin jan syryn aqtardy.
Anna Danchenko kim?
Anna Danchenko - qazaqstandyq telejúrgizýshi, jýrnalist, prodiýser jáne oqytýshy. Ol Qyzylorda oblysynyń Aral qalasynda ósken. Televiziiadaǵy eńbek jolyn 2006 jyly Aqtóbedegi «RIKA TV» arnasynda «Araily tań» baǵdarlamasynyń júrgizýshisi retinde bastaǵan. Keiin «31 arnada» jýrnalist, «Informbiýro» júrgizýshisi, prodiýser jáne birqatar avtorlyq jobalardyń júrgizýshisi bolyp eńbek etti.
2019 jyldan beri Anna Danchenko Production kompaniiasynyń negizin qalaýshy ári prodiýseri. «Juldyzdy shańyraq», «Qyzyqty Weekend» sekildi jobalar arqyly kórermenge tanymal. 2026 jyldyń qyrkúieginen bastap «Birinshi arna Eýraziiadaǵy» QosLike baǵdarlamasyn júrgizedi. Sonymen qatar ál-Farabi atyndaǵy QazUÝ-da ǵylymi-pedagogikalyq qyzmetpen ainalysady.
Anna Danchenko qazaq, orys jáne aǵylshyn tilderin meńgergen. Ol filologiia boiynsha magistratýrany úzdik támamdap, keiin doktorantýrada bilim alǵan. Televiziia jáne media salasynda shamamen 20 jyldyq tájiribesi bar.
