Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qisyqova elorda turǵyndaryn maska taǵý rejimin saqtaýǵa shaqyrdy, dep habarlaidy QazAqparat.
«Tótenshe jaǵdai rejimi toqtasa da, qalada karantindik sharalar saqtalyp otyr. Karantindik sharalardy alyp tastaý kezeńderi qalada ár jeti kún saiyn aýrýǵa shaldyǵýdyń azaiýyna qarai aiqyndalady. Karantindi alyp tastaýdyń naqty datasyn qala turǵyndary ózderi anyqtaitynyn atap ótken jón. Osy oraida shahar turǵyndary negizgi bazalyq talaptardy ustanýy kerek, iaǵni infektsiianyń taralýyna tosqaýyl bolatyn erejelerdi qatań saqtaý qajet», - dedi S. Qisyqova onlain baspasóz máslihatynda.
Onyń atap ótýinshe, keibir elderde infektsiia oshaqtary qaitadan shyǵýda. Osynyń saldarynan qaitadan karantin rejimin kúsheitý sharalary júrip jatyr.
«Virýs adamnan adamǵa qalai juǵatynyn taǵy de eske salyp ótkim keledi. Eger ara qashyqtyq eki metrden az bolsa, adam túshkirse nemese jótelse, sondai-aq adamnyń qoly kózge, aýyzǵa jáne murynǵa tiip ketse, infektsiia taralady. Sondyqtan qatań túrde maska taǵý rejimin saqtaý - eń senimdi qorǵanys», - dedi Sáýle Qisyqova.
