NurSultan qalalyq Politsiia departamentiniń qyzmetkerleri memlekettik tirkeý nómiri birdei 3 kólikti anyqtady, dep habarlaidy "Ult aqparat".
Politsiia departamentiniń málimetinshe, ákimshilik politsiia qyzmetkerleri Nur-Sultan qalasy aýmaǵyndaǵy jol qozǵalysyna monitoring jasaý barysynda bir-birinen aýmaityn eki kólikti anyqtaǵan. Osydan keiin politsiianyń barlyq saptyq bólimshelerine uqsas kólikterdi ustaý týraly baǵyttama jiberilgen.
«Videobaqylaý kameralarymen qaraý barysynda 11 tamyz kúni avtomobilderdiń birin politsiia qolǵa túsirdi. Kelesi kúni memlekettik tirkeý nómiri birdei ekinshi kólik anyqtalyp, ustaldy. Ustalǵan kólikterdiń júrgizýshileriniń aitýynsha, olar avtomobildi zańdy jolmen satyp alǵan. Sonymen qatar jol júrisi erejesin buzǵany úshin aiyppuldardy avtomobil ieleriniń biri ekinshisi úshin tólep kelgen. Qazirgi ýaqytta bul kólikter kommýnaldyq avtoturaqqa qoiyldy. Tergeý júrip jatyr», - dep atap ótedi vedomstvodan.
Sonymen qatar memlekettik tirkeý nómiri dál osyndai úshinshi kólik Óskemen qalasynda anyqtalǵan. Kólik iesiniń aitýynsha, memlekettik tirkeý nómiri E 658 VN 138 RF «Toyota Estima» markaly kóligine ákimshilik aiyppul tólengeni týraly uiǵarym turǵylyqty mekenjaiyna kelip turady. Biraq qujatta kórsetilgen datalarda ol elordada bolmaǵan.
