Elordada ókpeni jasandy jeldetý apparatynyń jalpy sany 434-ke jetkizildi. Bul týraly Antikor.live jobasynda Nur-Sultan qalasynyń Qoǵamdyq densaýlyq saqtaý basqarmasy basshysy Timýr Muratov aitty, dep habarlaidy QazAqparat.
«Qajet bolǵan jaǵdaida biz bir ýaqytta 18 densaýlyq saqtaý nysanyn qaita ózgertip, tósek-oryn sanyn 6 myńǵa deiin arttyra alamyz. Qalalyq ákimdik biraz jumystar júrgizdi. Biz ókpeni jeldetý apparatynyń sanyn kóbeittik. Bastapqyda olardyń sany 185 bolsa, qazir olardyń jalpy sany 434-ke jetti. Qýanyshqa orai, koronavirýstyń ekinshi tolqynyna daiyndyq jumystary óz jemisin berýde. Búgingi tańda juqpaly aýrýlar aýrýhanasynda jatqan 174 adamnyń 8-i ókpeni jeldetý apparatyna qosylǵan. Bul ambýlatorlyq jeliniń tiimdi jáne turaqty jumys isteitindigin kórsetedi», - deidi Nur-Sultan qalasynyń Qoǵamdyq densaýlyq saqtaý basqarmasy basshysy Timýr Muratov.
Onyń aitýynsha, qazirgi ýaqytta elordalyq mobildi toptar antikoagýlianttar, dárýmender men antipiretikterdi úige jetkizip beredi. Úsh kúndik baqylaý júrgizgen kezde dene qyzýy kóterilip ketken jaǵdaida ǵana naýqas aýrýhanaǵa jatqyzylyp, qosymsha tekserýden ótedi.
«Qazirgi ýaqytta qalada 27 rentgen qondyrǵysy jumys isteidi, onyń 11-i biyl jańartyldy. Keibir iri emhanada rentgen apparattarynyń sany eki esege artty. Qazir 19 kompiýterlik tomografiia jumys isteidi. Eger naýqas klinikaǵa óz betinshe júginse, ony filtr kabinetinde qabyldaidy. Eger naýqas 103 nómirine habarlassa, ony emhanaǵa baǵyttaidy», - deidi ol.
