Nur-Sultan qalasynda COVID-2019 indetine qarsy arnaiy jasaqtalǵan meditsinalyq uiymdar burynǵy jumys baǵytyna qaityp kelip jatyr. Bul týraly Nur-Sultan qalalyq densaýlyq saqtaý basqarmasynyń basshysy Sáýle Qisyqova málim etti, dep habarlaidy QazAqparat.
«Keibir meditsinalyq uiymdardyń jumysyn qaita qalpyna keltirý máselesi sheshilip jatyr. Olar koronavirýs infektsiiasynyń taralýyna jol bermeý maqsatynda COVID-2019 indetine qarsy arnaiy jasaqtalǵan bolatyn», - dedi Sáýle Qisyqova OKQ-da ótken baspasóz máslihatynda.
Basqarma basshysynyń aitýyna qaraǵanda, astana halqy qazir qalypty ómirge oralýda.
«Koronavirýs infektsiiasyna bailanysty buǵan deiin engizilgen shekteý sharalary aqyryndap alyna bastaldy. Birqatar nysandy asha otyryp, biz qalyptasqan qazirgi ahýaldy testen ótkizip jatyrmyz. Densaýlyq saqtaý júiesi jaǵdaidy baqylap, testilep, qadaǵalaýdy úirense, qatań karantin rejiminen shyǵýǵa bolady. Naýqastardy qabyldaityn oryndar elordada jetkilikti. Qaladaǵy aýrýhanalardyń bárinde koronavirýsty anyqtaityn provizorlyq ortalyq ashyldy», - dedi ol.
