Nur-Sultan qalasynyń qoǵamdyq densaýlyq saqtaý basqarmasynyń basshysy Sáýle Qisyqova elordada qazirgi tańda koronavirýs infektsiiasyn juqtyrǵan 9 adam aýyr halde jatqanyn málim etti, dep habarlaidy "Ult aqparat".
«Nur-Sultan qalasynda osyǵan deiin virýsty juqtyrǵan jalpy 316 adam anyqtaldy. Onyń 47 paiyzy erler, 53 paiyzy áielder. Koronavirýsty juqtyrǵandardyń 43 paiyzy – 30-49 jas aralyǵyndaǵy azamattar. 26 paiyzy 18-29 jasqa deiingiler, 16,5 paiyzy – 50-59 jas aralyǵyndaǵy adamdar bolsa, 9 paiyzy 60-69 jas aralyǵyndaǵy azamattar. 3 paiyzy – 70 jáne odan úlken jastaǵy kisiler. 3,4 paiyzy – 18-ge tolmaǵan balalar», - dedi Sáýle Qisyqova «Habar 24» arnasynda onlain rejimde ótken baspasóz máslihatynda.
Basqarma basshysynyń aitýynsha, jalpy elordada emdelip shyqqandardyń sany – 154 adam (48 paiyzy).
«Atalǵan azamattar úi jaǵdaiyndaǵy karantinde taǵy 14 kún boiy bolýy tiis. Sonymen qatar búgin aýrýhanadan bir shetel azamaty jazylyp shyqty. Atalǵan azamat Ystanbul-Nur-Sultan reisinen túsirilgen bolatyn. Qazirgi ýaqytta aýrýhanalarda 399 naýqas em alýda. Onyń 170-i koronavirýstan emdelýshiler. Onyń ishinde 10 naýqas – basqa oblystardyń turǵyndary. Sonymen qatar 9 naýqastyń jaǵdaiy aýyr halde. Onyń tórteýi jasandy tynys alý apparatyna qosylǵan. Bekitilgen hattamaǵa sáikes tiisti em júrgizilip jatyr. Basqa naýqastardyń jaǵdaiy qalypty», - dedi ol.
