Elordadaǵy Ulttyq akademiialyq kitaphanada ótip jatqan «Shyǵystyń shoqjuldyzdary» atty halyqaralyq konferentsiiada kóne túrki tilindegi Quran kitaby tanystyryldy, dep habarlaidy QazAqparat tilshisi.
«Prezidentimiz aitqandai, ekonomikamen qatar mádeni-gýmanitarlyq baǵyttarǵa da úlken mán berýimiz shart. Osy baǵytta túrki integratsiiasyna Halyqaralyq Túrki akademiiasy úlken úles qosyp otyr dep aýyz toltyryp aita alamyz.
Akademiia baýyrlas túrki halqynyń mádeni-gýmanitarlyq bailanysyn nyǵaitýǵa zor eńbek sińirýde. Túrkiniń tarihyna, tiline, mádenieti men ádebietine qatysty irgeli zertteýler júrgize otyryp, birtutas rýhani álemimizdi baiytý jolynda aýqymdy jumys atqaryp keledi. Solardyń biri Akademiianyń uiytqy bolýymen jaryq kórip, búgin kópshilikke tanystyrylyp otyrǵan kóne túrki tilindegi Quran kitaby», - dedi Senat spikeri.
Aitýynsha, qasietti Quranymyz osydan 1000 jyl buryn arab tilinen kóne túrki tiline alǵash ret aýdarylǵan eken.
«Munyń ózi sol kezdegi túrki ǵylymynyń joǵary deńgeiin kórsetedi. Túrki órkenieti 8-9-ǵasyrlardyń ózinde ozyq dárejege kóterilgeni tarihtan belgili.
Qasietti Quran kitabynyń sol kezdegi faksimile nusqasynda qaita basylýy dintanýshylar, tarihshylar, jalpy tutas túrki jurty úshin mańyzdy oqiǵa», - dedi Máýlen Áshimbaev.
