Áskeri qyzmetshiler elordadaǵy qoǵamdyq oryndardy dezinfektsiialaýda, dep habarlaidy "Ult aqparat".
«Nur-Sultan qalasy dezinfektsiialaý boiynsha 7 sektorǵa bólingen. Ár sektorda dezinfektsiia jasalatyn nysandar bar jáne quramyna 20 adam engen top jumys isteidi. Kún saiyn tańerteń jeke quram, tehnika, dezinfektsiia jasaityn eritindi daiyndalyp, tapsyrma oryndaýǵa shyǵamyz. Men tórtinshi sektorǵa jaýap beremin. Bul sektorda saýda-sattyq dúkenderi, qalalyq aýrýhanalar, ákimdik siiaqty qashyqtan jumys isteý múmkin emes nysandar bar. Nysannyń ishin dezinfektsiialamaimyz, sebebi bizdiń qoldaǵy eritindi nysan syrtyn zalalsyzdandyrýǵa arnalǵan», - deidi QR Qorǵanys ministrliginiń №68665 áskeri bólimi Radiatsiialyq, himiialyq jáne biologiialyq qorǵaý qyzmetiniń basshysy Dmitrii Efimov.
Onyń aitýynsha, adamdar kóp júretin jerler dezinfektsiialanýda.
«Mysaly, Ulttyq ǵylymi meditsinalyq ortalyqtyń negizgi kire berisin, adamdar otyratyn jáne kólikter turaǵyn dezinfektsiialap jatyrmyz. Búgin osylai jumys istep jatqanymyzǵa ekinshi kún. Jumys barysy neshe kúnge deiin sozylatynyn bilmeimiz. Biraq qansha qajet bolsa – sonsha jumys isteýge daiynbyz. Tolyq bir kún jumys isteý úshin 6 tonna dezinfektsiia jasaityn suiyqtyq ketedi», - deidi ol.
