Elordadaǵy qoǵamdyq kólikterdiń qyzmetine jaýapty CTS kompaniiasynyń (burynǵy Astana LRT – avt.) basshysy Bekmyrza Igemberdinov erteńnen bastap jolǵa shyǵatyn qoǵamdyq kólikterdiń sany qysqartylatynyn málim etti, dep habarlaidy "Ult aqparat".
«Qazirgi ýaqytta elordada jolaýshylar aǵynynyń tómendegeni baiqalady. Nur-Sultan qalasynyń ákimi Altai Kólginov atap ótkendei keshe jolaýshylardyń azaiý deńgeii 30 paiyz bolsa, búgin taǵy 10 paiyzǵa tómendep ketti. Osylaisha barlyq baǵdar boiynsha jolaýshylar aǵynynyń 40 paiyzǵa azaiǵany baiqalady», - dedi Bekmyrza Igemberdinov OKQ-da ótken baspasóz máslihatynda.
CTS kompaniiasynyń basshysy elordada karantinniń engizilýine bailanysty erteńnen bastap qoǵamdyq kólikterdiń jumysyna ózgeris engiziletinin aityp ótti.
«Atap aitqanda avtobýstardyń sany qysqartylady. Búgingi kúni Nur-Sultandaǵy jolǵa shyǵatyn avtobýstardyń sany 856 bolsa, olar 676-ǵa deiin azaiady. Barlyq baǵyt-baǵdar boiynsha qysqarý deńgeii 21 paiyzdy quraidy. Qalalyq jáne ekspres baǵdarlardaǵy avtobýstardyń sany 20 paiyzǵa, qala mańyna qatynaityn avtobýstardyń sany 32 paiyzǵa qysqarady. Sonymen qatar, avtobýstardyń júrý ýaqytyna ózgeris enedi. Erteńnen bastap ekspres baǵdarlar men qala mańyna qatynaityn avtobýstar 21.00-ge deiin ǵana júretin bolady», - dedi ol.
