Elordada qaýipti turǵyn úi keshenderi jóndele bastady, dep habarlaidy "Ult aqparat" qala ákimdigine silteme jasap.
Turǵyn-úi kommýnaldyq sharýashylyǵyn jańǵyrtý baǵdarlamasy boiynsha biyl qalada 50-den astam kóppáterli turǵyn úi kesheni, 100-den asa jedelsaty jóndeledi jáne jańasyna aýystyrylady. Budan bólek, 2020 jyly 800 otbasy apattyq eski úiden jańa páterge kóshiriledi.
Buǵan deiin elorda ákimi Altai Kólginov «Orbita» jáne «Territoriia komforta» túrǵyn úi keshenderi turǵyndarymen kezdesýinde úilerdi jóndeýge qatysty másele kóterilgen bolatyn. Atalǵan turǵyn úi keshenderin jóndeý bastaldy.
Turǵyndar jel tursa dalaǵa shyǵýǵa qorqatynyn aitqan.
«Balalardyń basyna plitka qulap ketedi dep qaýiptenip, dalaǵa shyǵarmaimyz. Sondai-aq órt qaýipsizdigi júiesi de joq, qorqyp ómir súrip jatyrmyz. Ózimizdiń úide «plitka qulap ketedi» dep qaýiptenbei júrgimiz keledi», degen bolatyn turǵyndar.
«Biyl aýqymdy jumys atqarylady, turǵyn úi kesheni qaptamasy turǵyndarǵa qaýip tóndirmeýi tiis. «Orbita» jáne «Territoriia komforta» turǵyn úi keshenderiniń salynǵanyna kóp bolmasa da, jel turǵan saiyn plitkasy qulaidy, vitrajdary durys ornatylmaǵan jáne t.b. Qazir jóndeý bastaldy. Qaptamasyn aýystyryp, vitrajdardy qaita montajdaimyz, sondai-aq órt qaýipsizdigi júiesi men jylytý júiesin jóndep, basqa da máselelerdi sheshetin bolamyz», – dedi qala ákimi Altai Kólginov.
Eske sala ketsek, byltyr qarasha aiynda «Orbita» turǵyn úi kesheninde balkony ornynan «jyljyp», eden dirildegen. Osy máselege túsinik bergen qalalyq orta sapasy jáne baqylaý basqarmasy basshysynyń orynbasary Dáýlet Dosqulov turǵyn úi kesheni problemalyq nysan ekenin moiyndap, ákimdiktiń úleskerler máselesin sheshý boiynsha sharalar jospary bar ekenin jetkizgen. Onyń aiasynda úidiń konstrýktsiiasyny nyǵaitý, qasbetin aýystyrý jáne resmi túrde paidalanýǵa berý kózdelgen.
