Elordanyń mobildik toptary táýlik ishinde 60-qa jýyq kásipkerlik nysanyn tekserip, karantin rejimin buzýdyń 5 faktisin anyqtaǵan, dep habarlaidy Nur-Sultan qalasy Politsiia departamentiniń baspasóz qyzmeti.
Bas sanitarlyq dárigerdiń koronavirýs infektsiiasynyń taralýyna qarsy birqatar aldyn alý sharalary kórsetilgen Qaýlysyna qaramastan, qoǵamdyq tamaqtaný jáne oiyn-saýyq mekemeleri nysandarynyń ákimshileri men ieleri tarapynan zańbuzýshylyqtar tirkeldi.
Osylaisha, túngi saǵat 01:33-da Qosshyǵululy kóshesindegi «Ajax» kompiýter klýbynda jeli oiyndaryna qumar 10-nan astam adam jinalǵan. Jas azamattar bos ýaqytyn alańsyz ótkizip, sanitarlyq talaptardy saqtamaǵan.
Qaladaǵy «Baiqońyr» aýdanynyń politseileri, ákimdik ókilderinen quralǵan mobildik toptary reid barysynda Baraev kóshesindegi «Panaehali» baryn anyqtady. Atalmyn nysan túngi ýaqytta jumys istegen. Mekeme ishinde 30-dan astam adam júrgen. Bul bar buǵan deiin karantin talaptaryn buzǵany úshin birneshe ret jaýapqa tartylǵan.
Tártip buzýshylarǵa qatysty jinalǵan material ákimshilik jaýapqa tartý jáne kóńil kóterý mekemesiniń qyzmetin toqtatý úshin tiisti organǵa jiberildi.
Nur-Sultan qalasynyń Politsiia departamenti karantin talaptaryn buzǵandardyń jaýapqa tartylatynyn eskertip, elorda turǵyndaryn sanitarlyq normalar men áleýmettik qashyqtyqty saqtaýǵa shaqyrady.
