El astanasynda karantin rejimi uzartyldy. Nur-Sultan qalalyq jol politsiiasy qala turǵyndaryna karantin rejimin saqtaý kerektigin eskertedi.
Kez-kelgen quqyqbuzýshylyq úshin jaýapkershilik qarastyrylǵan. Azamattarǵa jaqyn mańdaǵy azyq-túlik dúkeni, dárihanaǵa barýǵa, meditsinalyq qyzmet alý men ruqsat etilgen jumysqa barýǵa bolady. Basqadai jaǵdaida úiden shyǵýǵa tyiym salynǵan, dep habarlaidy "Ult aqparat" politsiia departamentine silteme jasap.
Ótken táýlikte, iaǵni 15 sáýirde 139 azamat ákimshilik jaýapqa tartyldy, olardyń úsheýi tutqyndalyp, 85-ne aiyppul salyndy, 32 azamatqa eskertý jasalsa, 19 is sot qaraýynda jatyr.
Ártúrli ákimshilik jaýapqa tartylǵan 106 avtokólik kommýnaldyq turaqqa jiberildi. Karantin rejimi bastalǵaly bul san 792-ge jetti.
Jalpy karantin bastalǵaly 2 myńnan astam adam ákimshilik jaýapqa tartyldy, olardyń 183-i qamaýǵa alynyp, 1330 azamatqa aiyppul salyndy, 472 eskertý jasalyp, 65 material sottyń qaraýynda jatyr.
Qala aýmaǵy kóshelerdiń shekarasy arqyly sharshy alańdarǵa bólingen. Árqaisysynda tártip saqshylary jaǵdaidy baqylap tur. Qalada 26 mobildik post ornatylǵan.
«Politsiia qyzmetshileri engizilgen shshekteýlerge bailanysty turǵyndar arasynda túsindirý jumystaryn júrgizip jatyr. Tótenshe jaǵdai rejimin buzǵan adamdar zańǵa sáikes jazalanady», - delingen PD habarlamasynda.
Birneshe ret eskertý jasalyp, turǵyndarmen aldyn ala túsindirý jumystary júrgizilip jatqanyna qaramastan kópshilik bul talapqa selqos qaraidy.
«Qurmetti qala turǵyndary, turǵyndardyń qaýipsizdigin qamtamasyz etý maqsatynda karantin rejimin saqtaýdy talap etemiz. Ótkizilip jatqan sharalarǵa túsinistikpen qarap, politsiia qyzmetshileriniń zańdy talaptaryn oryndap, infektsiianyń aldyn alýda olarǵa qoldaý kórsetýlerińizdi suraimyz. Barlyq sharalar sizdiń jáne jaqyndaryńyzdyń densaýlyǵy úshin qolǵa alyndy», - dep atap ótti politsiia ókili.
