Elordada qatań karantin engizilgenine qaramastan tártip buzyp, qoǵamǵa qaýip tóndirip otyrǵan nysandar sany az bolmai shyqty. Olardyń arasynda tipti bir ret eskertý jasalǵanymen zańsyz áreketke qaita jalǵastyrǵandar da tabylyp jatyr.
Nur-Sultan qalalyq Politsiia departamentiniń ókilderi arnaiy júrgizgen tekserý barysynda osyndai kóptegen jáitterdi anyqtaǵan. Baspasóz qyzmetiniń málimetterine qaraǵanda, karantin talaptaryn buzǵan nysandar arasynda monsha, kafe-barlar, tehnikalyq qyzmet kórsetý stantsiialary bolǵan.
«Budan bólek, kelýshilerge kalian usynatyn oiyn-saýyq oryndary anyqtaldy. 7 shildeden bastap Qazaqstanda meiramhanalarda, kafelerde jáne basqa da qoǵamdyq mekemelerde kalian shegýge tyiym salatyn zań kúshine endi. Endi kaliandy tek úide ǵana shegýge bolady. Qaladaǵy «Shishka» laýndj-barynda mekeme basqarýshysy klientterge kalian usynyp, bardyń qyzmetkeri men qonaqtaryna qatysty QR ÁQBK 441-baby boiynsha ákimshilik hattama toltyryldy. Tekserý kezinde bólmede 30-dan astam klient bolǵan. Atalǵan nysannyń karantin rejimin birneshe ret buzǵany anyqtaldy. Sondai-aq 13 tamyzda «Almaty» aýdanynyń jedel toby «Prianik» meiramhanasynda túngi ýaqytta karantin rejiminiń buzylǵanyn jáne kalian shegý faktisi oryn alǵanyn anyqtady. Mekeme iesine qatysty QR ÁQBK 441-baby 3-bóligi boiynsha ákimshilik is qozǵaldy»,-delingen habarlamada.
Sondai-aq onda temeki ónimderin, onyń ishinde qyzdyrylatyn temeki men kalian tutynatyn adamdarǵa shara qoldanbaǵany úshin iesine 25-ten 60 AEK-ke deiin aiyppul salynady. Kún saiyn quramyna ákimdik, taýarlar men qyzmetterdiń sapasy men qaýipsizdigin baqylaý basqarmasynyń, Almaty aýdanynyń jergilikti politsiia qyzmetiniń qyzmetkerleri kiretin jedel top kásipkerlik nysandary boiynsha reidter júrgizedi.
«Olar 14 tamyz kúni saǵat 22:00-den 01:00 aralyǵynda shaǵyn jáne orta biznestiń 6 nysanynda karantin sharalarynyń buzylǵanyn anyqtady. Atap aitqanda, «Carlife» tehnikalyq qyzmet kórsetý stantsiiasy, «Ofitserskii» syra bary, «Baramysh» pavilony, «Hottabych» saýnasy, «Prianik» meiramhanasy jáne «Shishka» laýndj-bary karantin rejimin buza otyryp jumys istegen. Barlyq jinalǵan materialdar QR ÁQBK 425-baby boiynsha protsessýaldyq sheshim qabyldaý jáne jaýapqa tartý maqsatynda Taýarlar men kórsetiletin qyzmetterdiń sapasy men qaýipsizdigin baqylaý departamentine jiberildi»,-dep habarlady baspasóz qyzmeti.
