Qazaqstannyń Ispaniiadaǵy Elshisi Konstantin Jigalov Kataloniia avtonomiialyq birlestigine jumys saparmen bardy, dep habarlaidy "Ult aqparat" QR SIM baspasóz qyzmetine silteme jasap.
«Fira de Barcelona» kórme kesheniniń bas direktory K. Serraiong jáne bas atqarýshy direktory R. Sapateromen kezdesý ótti. Bul kezdesý shilde aiynda Nur-Sultan qalasynda Eýroaziialyq aimaq elderi úshin «Aqyldy qalalar kongresin» ótkizýge bailanysty ótkizildi. R.Sapateronyń Qazaqstan astanasyna qańtar aiyndaǵy saparynyń jáne onyń ákimi A. Kólginovpen kelissózderiniń qorytyndysy shyǵaryldy, osydan keiingi is-qimyl algoritmi anyqtaldy.
Jirona saýda palatasynyń basshylyǵymen Qazaqstannyń 2018 jáne 2019 jyldardaǵy biznes-missiialarynyń qorytyndysy talqylanyp, olardyń negizinde qazirgi ýaqytta taraptar Kataloniia iskerlik toptary delegatsiiasynyń maýsym aiynda Qazaqstanǵa saparyn daiyndaýda. Aýyl sharýashylyǵy, munai-himiia jáne týristik salalarda, sondai-aq densaýlyq saqtaý sektorynda yntymaqtastyqty keńeitýge basty nazar aýdarý kózdelýde. Bul máseleler birqatar ekijaqty kezdesýler barysynda egjei-tegjeili qaraldy.
Jirona áýejaiynyń jańa direktory V. Paiares Pikemen qazaqstandyq týroperatorlarmen jazǵy kezeńge charterlik reistiń ashylýyn jáne Jerorta teńiziniń Kosta Brava jaǵalaýynda «all inclusive» júiesi boiynsha qonaq úilerde turýdy qamtityn qazaqstandyq týristerge arnalǵan paketti birlesip ázirleý múmkindigi talqylandy. Jironanyń yńǵaily geografiialyq ornalasýyn (Barselona, Andorra jáne baskalarǵa jaqyn) eskere otyryp bul týristik marshrýt óte tartymdy baǵytqa ainalýy múmkin.
«Iberhospitex» kataloniialyq kompaniiasynyń basshylyǵymen Qazaqstan elordasyna kezekti saparynyń qorytyndysy talqylandy, onyń qorytyndysy boiynsha 2020 jyldyń sońyna deiin Nur-Sultan qalasynda júrek-qan tamyrlary interventsiiasy salasynda meditsinalyq jabdyqtar men joǵary tehnologiialyq ónimder shyǵarý boiynsha jergilikti óndiris ashý josparlanýda.
Sapardyń mańyzdy quramdas bóligi Kataloniianyń Ulttyq kitaphanasyna barý jáne onyń kóp jyldyq direktorymen Evgeniia Serramen kezdesý boldy. Elshi kitaphana qoryna ispan tiline aýdarylǵan Qazaqstan Respýblikasynyń Tuńǵysh Prezidenti N. Á. Nazarbaevtyń «Táýelsizdik dáýiri» jáne «Qazaqstan joly» atty kitaptaryn, Qazaqstan prozasy men poeziiasynyń antologiiasyn, elimizdiń tarihy men mádenieti týraly kitaptardy tapsyrdy. Abaidyń «Qara sózin» direktorǵa tapsyryp Q. Jigalov uly ǵalym, aqyn, oishyl Abaidyń 175 jyldyǵyn Qazaqstanda jáne shetelde atap ótý týraly áńgimeledi.
E. Serra kitaphana ǵimaratynyń birinshi tasy 1401 jyly qalanǵanyn, qazirgi ýaqytta onyń kitap qory tórt millionnan astam danany quraityndyǵyn aitty. «Kataloniia bas kitaphanasy tarihta alǵash ret Qazaqstan týraly kitaptardy syiǵa aldy jáne buǵan baǵa jetpes syilyq», - dedi E. Serra.
Barselona tsifrlandyrý men tiimdi basqarýdy engizý salasyndaǵy jetistikterimen keńinen álemde tanymal. Qalada jyl saiyn álemge áigili Smart City Expo jáne Mobile World Congress forýmdary ótkiziledi. Kórmeden qala ekonomikasyna jyl saiyn 2,6 mlrd eýrodan astam tabys túsedi.
