Elordada Fariza Ońǵarsynova atyndaǵy jańa kóshe ashyldy, dep habarlaidy QazAqparat.
Aqyn esimi EKSPO-2017 mańynda «Vena oramy» turǵyn úi kesheni janyndaǵy jańa kóshege berildi. Saltanatty ashylýǵa qoǵam qairatkerleri, depýtattar jáne aqynnyń oqyrmandary jinaldy.
«Qazaqtyń uly aqyny, dara qyzy Fariza apamyzdyń kóshesine kelgenderińiz úshin rahmet. Ótkendi umytpai, eske alyp, jańa kóshelerdiń birine Fariza apamyzdyń esimin berip otyrmyz. Apamyz Parlament qabyrǵasynda da halyqtyń muńyn joqtap, kóp eńbek sińirdi. Sondyqtan, qazaqtyń osyndai uly qyzynyń esimin kóshege berý kelesi urpaqqa da tárbielik mańyzyn beredi dep oilaimyn. Apamyzdyń aty máńgi óshpesin. Búgin túste Farizanyń rýhyna as beremiz, qazir ziratyna baryp quran baǵyshtaimyz. Osy kóshe apamyzdyń esimimen dańǵyl jolǵa ainalsyn», - dedi Nur-Sultan qalasy ákiminiń orynbasary Baqtiiar Máken saltanatty ashylý rásiminde.
Sonymen birge, ashylýǵa kelgen jazýshy jáne qoǵam qairatkeri Aldan Smaiyl Fariza Ońǵarsynova týraly estelikterimen bólisti.
«Aqynyn syilaǵan elge árýaq ta, Alla da riza bolady. Fariza keń adam edi, minezi qattylaý bolǵanymen, jan-jaǵyna jaqsylyq jasap júretin shalqar jan edi. Myna kósheniń de ózindei keńdigin kórip, qýanyp otyrmyz. Fariza aqiqattyń aqyny boldy, shyndyqty aityp ótti. Shyndyqty aitýdyń ózi – erlik. Eldiń shyndyǵyn, eldiń muńyn óle-ólgenshe kúittep ketti. Al qazir Farizaǵa degen halyqtyń sheksiz mahabbatyn kórip júrmiz. Fariza qazaqtyń qyzy bola otyryp, uly da bola bilgen adam. Qazaq óziniń igi jaqsylaryna eshkimdi teńgermeidi. Biraq, Farizany Mahambetke teńedi. Men dál sondai ulylarǵa teńegen basqa qairatkerlerdi bilmeimin. Fariza óz zamanynda Mahambettiń ornyn joqtatpaǵan, sony toltyrýǵa tyrysqan uly tulǵalardyń biri boldy», - dedi Aldan Smaiyl.
Jańa kósheni aqynnyń uly Almas Ońǵarsynov pen Nur-Sultan qalasy ákiminiń orynbasary Baqtiiar Máken saltanatty túrde ashty.
Aita keteiik, búgin 16.00-de QR Ulttyq akademiialyq kitaphanasynda Fariza Ońǵarsynovanyń «Shilde» jáne «Poldnevnyi Jar» kitaptarynyń tusaýkeseri ótedi.
Keshki 19:00-de Jastar teatry sahnasynda «Fariza» spektakli qoiylady.
