Elordada elimizdiń táýelsizdigi jáne aýmaqtyq tutastyǵy úshin kúreste erlik kórsetkenderdi máńgi este qaldyrý maqsatynda memorialdyq keshen salý máselesi pysyqtalýda. Bul jaiynda Senat depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy QazAqparat.
«Saiasi qýǵyn-súrgin qurbandaryn, onyń ishinde Qazaqstannyń bostandyǵy, táýelsizdigi jáne aýmaqtyq tutastyǵy úshin kúreste erlik kórsetkenderdi máńgi este qaldyrý maqsatynda qazirgi ýaqytta múddeli memlekettik organdar elordada memorialdyq keshen salý máselesin pysyqtaýda. Atalǵan másele jan-jaqty zerdelengennen keiin Qazaqstan Respýblikasy Prezidentiniń 2020 jylǵy 24 qarashadaǵy № 456 Jarlyǵymen bekitilgen Saiasi qýǵyn-súrgin qurbandaryn tolyq aqtaý jóninde memlekettik komissiianyń jumysy barysynda qaralatyn bolady», - dedi Premer-Ministr.
Onyń atap ótýinshe, memlekettik deńgeide saiasi qýǵyn-súrgin jáne asharshylyq qurbandaryn eske alý kúni 2020 jyldyń 31 mamyrynan bastap «Taǵzym» aktsiiasy ótkizilip keledi. Elimizde bir ýaqytta bir minýttyq únsizdik uiymdastyrylady.
«BAQ-ta keńinen jariialaýmen túrli is-sharalar ótkizilýde. Onyń ishinde dini qyzmetkerler men konfessiialar ókilderi uiymdastyrǵan aza tutý, memorialdarǵa gúl shoqtaryn qoiý, telearnalarda HH ǵasyrdyń 20-30 jyldarynyń tarihy, qýǵyn-súrginge ushyraǵan jáne deportatsiialanǵan halyqtardyń taǵdyry týraly derekti filmder mpren arnaiy baǵdarlamalar kórsetilýde. Sonymen birge osy taqyryp tarihshylarmen, saiasattanýshylarmen jáne basqa da múddeli mamandarmen jańalyqtar siýjetterinde, suhbattarda keńinen jariialanýda. Atalǵan aýqymdy is-shara jyl saiyn ótkiziletin bolady», - dedi Asqar Mamin.
