Jalpy sany 1 819 adam karantinge alynǵan, dep habarlaidy elorda ákimdiginiń resmi saity. Sońǵy eki kúnde Nur-Sultanda koronavirýs infektsiiasynyń 34 jańa jaǵdaiy tirkeldi. Bul týraly Nur-Sultan qalalyq densaýlyq saqtaý basqarmasynyń basshysy Sáýle Qisyqova málimdedi.
«15 sáýirde 5,3% ósimmen 15 jaǵdai, 16 sáýirde 6,4% ósimmen 19 jaǵdai. Tórt jaǵdai pnevmoniia kúdigimen birneshe kúnnen beri statsionarda bolǵan naýqastar. Diagnostikadan keiin koronavirýstyq infektsiia anyqtaldy. Bir jaǵdai KVI bolýyna ekspress-testileýge monitoring arqyly. Ol naýqas ári qarai tekserý úshin provizorlyq statsionarǵa jatqyzylyp, koronavirýs rastaldy. 11 jaǵdai – naýqastardyń jaqyn bailanystary, – otbasy músheleri, áriptester. Buǵan deiin olar oqshaýlanyp, tekserilip, infektsiianyń rastalýyna bailanysty aýrýhanaǵa jatqyzyldy», – dedi Sáýle Qisyqova onlain-brifing kezinde.
Sonymen qatar koronavirýs juqtyrýdyń 18 oqiǵasy «Sharapat» áleýmettik qyzmet kórsetý ortalyǵynan anyqtaldy.
«Nur-Sultan qalasynyń bas memlekettik sanitarlyq dárigeriniń qaýlysyna sáikes, meditsinalyq-áleýmettik mekemelerdiń qyzmetkerleri men qaraýyndaǵylarǵa tekserý júrgizilýde. «Sharapat» ortalyǵynda 380 adam, onyń ishinde 306 adam jáne 74 qyzmetker tekserýden ótti. Nátijesinde koronavirýs juqtyrýdyń 18 oqiǵasy anyqtaldy», – dedi Sáýle Qisyqova.
Qazirgi ýaqytta KVI bar naýqastar ishinen 10 jaǵdaiy turaqty aýyr, 3 naýqas ókpeni jasandy jeldetý qurylǵysynda. Olardyń ekeýi Respýblikalyq qarqyndy terapiia jáne ekstrakorporaldyq membranalyq oksigenatsiia ortalyǵynda em alady. Em sharalary KVI diagnostikasy men emdeýdiń klinikalyq hattamasyna sáikes júrgiziledi. Qalǵan emdelýshilerde jaǵdaiy qanaǵattanarlyq. Emdeý sharalary jalǵasýda. Karantinde barlyǵy 1819 adam bar.
2020 jyldyń 9-16 sáýiri aralyǵynda 8 716 adamǵa jedel testileý ótkizildi. Onyń ishinde oń nátijemen 106 (1,3%) jaǵdai anyqtalyp, qosymsha tekserý úshin provizorlyq statsionarlarǵa (PTR) jatqyzyldy. Olardyń arasynan 70 adam teris nátijemen shyǵaryldy. Sonymen qatar 692 meditsina qyzmetkeri qonaq úi keshenderinde ornalasqan. Onyń ishinde «Hilton» – 305 adam; «Diplomat» – 46 adam; «Dýman» – 341 adam.
