Qazaqstannyń astanasynda 2019 jyldyń 24-25 qazanynda jyl saiynǵy «Digital Bridge» halyqaralyq tehnologiialyq forýmy ótedi, dep habarlaidy QazAqparat Astana Hub baspasóz qyzmetine silteme jasap.
Forýmnyń basty qatysýshylary - IT-kompaniialar, kásipkerler, sarapshylar, investorlar, sondai-aq memlekettik jáne korporativtik sektorlardyń ókilderi. Is – sharanyń negizgi maqsaty - sandyq damý salasynda tájiribe jáne innovatsiialyq sheshimder almasý úshin dialog alańyn uiymdastyrý.
Forýmda basty is-sharalardyń biri - «Bolashaqtaǵy bilim: tehnologiialardyń bilim berý júiesin ózgertýi» paneldik sessiiasy. Sarapshylar búgin bilim berý júiesinde qandai ózgerister bolyp jatqanyn jáne tehnologiiany paidalaný salasynyń negizgi máselelerin sheshýge qalai kómektesetinin talqylaidy.
«Biz mamandardy daiarlaýdyń burynǵy úlgisi qazir jaramsyz ekenin túsinemiz. Internet paida bolǵanǵa deiin ómir baiaý júrdi. Eger buryn injenerlerdi 4 jyl oqytsa, onda bul bilim mamanǵa ómir boiy jetetin bolatyn. Sondai-aq dárigerler qaýymyn alatyn bolsaq, olar da ómir boiy bir ota jasap júretin. Biraq sodan keiin internet paida bolyp, jahandaný úderisi bastaldy, bul oiyn erejelerin túbegeili ózgertti. Endi ýniversitette bir ǵana bilim alý jetkiliksiz: kez kelgen injener men dárigerdiń kásibinde únemi ózgerister oryn alýda. Ýniversitette alǵan bilimdi óz jumysymyzda qoldana alatynymyz zań emes. Tipti 99,9% jańa bilim alýǵa, qaita daiarlaýǵa jáne izdeýge týra keledi. Sondyqtan bolashaq biliminiń alǵashqy tiregi - úzdiksiz bilim», - deidi bilim berý salasynyń mamany, biotehnolog Dámel Mektepbaeva.
Astana Hub baspasóz qyzmetiniń málimetinshe, biylǵy jyly forým qatysýshylary úshin túrli taqyryptarda ashyq talqylaýlar uiymdastyrylady: bolashaqtyń bilimi, venchýrlik qarjylandyrý, kibersport máseleleri, biznes-inkýbatsiia, sandyq media. Munda qatysýshylar arasynda B2B kezdesýler uiymdastyrylady.
Forým kúnderi dástúrli túrde jyl saiynǵy Astana Hub Awards syilyǵy ótedi, ol Qazaqstannyń IT-indýstriiasyn damytýǵa qosqan úlesi úshin beriledi, sondai – aq Astana Hub Battle - tehnologiialyq startaptar arasyndaǵy jarystar ótedi.
