Elordadaǵy Triatlon saiabaǵynda «Iarkokross - JUNGLE» jazǵy sharasy ótti, dep habarlaidy Elorda Info.
«Bul respýblikalyq joba bolyp tabylady. Osymen jetinshi jyl qatarynan ótkizip jatyrmyz. Búgingi merekege qatysýǵa 1200 astanalyq ótinim bildirdi. Jalpy jyl sanap qatysýshylardyń sany artyp keledi. Bul sharanyń basty ereksheligi - jeńimpazdar men jeńilgender bolmaidy, iaǵni qatysýshylardyń júgirý jyldamdyǵyn ólshemeimiz. Bizge eń bastysy – qatysýshylardyń jaqsy kóńil-kúii men ásem kúlkisi kerek», - dedi sharanyń basty uiymdastyrýshysy Aleksandra Komleva.
Iarkokross - JUNGLE-ge qatysý 3 jasqa deiinshi balalarǵa tegin, odan joǵary balalar úshin 2000 teńge, al eresekter úshin 3000 teńgeden bastaý alady. Aita keterligi shara jaqyndaǵan saiyn bilet quny joǵarylai túsedi.
«Biylǵy iarkokross qatysýshylaryn jumbaq pen túrli shytyrman oqiǵalarǵa toly JUNGLE kútedi. Onda eriktiler jyrtqyshtar ańdar men shóp qorektilerge ainalady, sondai-aq biz barlyq qatysýshylar úshin tosynsyilar ázirledik. Iarkokrosqa barlyǵy 70-tei erikti jumyldyryldy. Sórege jetken barlyq qatysýshylarǵa jeńimpaz medali beriledi», - dedi ol.
Uiymdastyrýshylardyń aitýynsha, atalǵan sharanyń negizgi maqsaty – qala turǵyndaryna jarqyn kóńil-kúi syilaýmen qatar, shahardy jasyl-jelekke toltyrý.
«Júgiristen túsken barlyq qarajattar qaiyrymdylyqqa jumsalady. Iaǵni qalada aǵash otyrǵyzylady. Osy kúnge deiin elordada 500-den astam aǵash otyrǵyzyldy», - dedi ol.
Sondai-aq, shara uiymdastyrýshysy qatysýshylardyń jii qoiatyn boiaý neden jasalady jáne ol qaýipsiz be degen suraqqa jaýap berdi.
«Boiaýlar túrli-tústi pýdradan jasalady. Ol - ekologiialyq taza jáne qaýipsiz, iaǵni krahmal men taǵam boiaǵyshtary qoldanylady. Degenmen kózdi qorǵaý úshin kún sáýlesinen qorǵaityn kózildirik kiiýdi jáne aýyzǵa kirip ketpeýi úshin maska taǵýdy usynamyz», - dedi ol.
13 shildede Qaraǵandy da bastaý alǵan boiaýlar merekesi aldaǵy 27 shilde kúni Kókshetaý jáne 17 tamyzda Shymkent qalasynda ótedi.
