Elordada bir kúnde sanitarlyq normany buzǵan 15 nysan jabyldy, dep habarlaidy "Ult aqparat" qala ákimdigine silteme jasap.
Politseiler, epidemiologtar jáne ákimdik qyzmetkerleri birlesip qyzmeti isteýge ruqsat berilgen nysandarda sanitarlyq normanyń saqtalýyna qatysty kúndelikti reid júrgizedi. Bir táýlik ishinde qorǵanys quralynyń bolmaýy, ortalyqtandyrylǵan tasymaldaý jáne dezinfektsiia júrgizý sekildi sanitarlyq normalardy buzǵany úshin 15 nysannyń qyzmeti toqtatyldy.
Olardyń qatarynda qurylys kompaniiasyy, qonaq úi men meiramhana bar. Degenmen, elorda kompaniialarynyń basym bóligi sanitarlyq-epidemiologiialyq talaptardy qatań saqtaýda. Jumys tártibi (tamaq tasymaldaýdan basqa): tańǵy saǵat 9-dan keshki 18-ge deiin.
Qyzmetkerlerdi jumysqa deiin jáne úige qyzmettik kólik jetkizedi. Olar arnaiy kiimmen, qorǵanys quraldarymen jáne t.b. qamtamasyz etilgen. Aýysym basynda barlyǵy sanitarlyq óńdeýden ótedi.
«Bul qalada qalǵan adamdar. 50%-dan astamy aýdandarǵa ketti. Jumysqa jaqyn jerde turatyn qyzmetkerler tańdap alyndy. Ár tańerteń saiyn saǵat 9-ǵa deiin jáne keshki 18-den keiin teplovizor arqyly JRVI belgisiniń bar-joǵy tekseriledi. Shtatymyzǵa tekserýdi júzege asyratyn meditsina qyzmetkerin qabyldadyq. Sondai-aq kireberiste kontroler árbir klientti teplovizormen tekseredi», - deidi «Megastroi» qurylys gipermarketi direktorynyń orynbasary Oksana Sýhorýkova.
Gipermarketke kire beriste arnaiy belgi jasaldy, barlyq sanitarlyq normalardy saqtaýǵa yńǵaily bolý úshin adamdar arasynda qashyqtyq – eki metr.
«Satyp alýshylar kezekpen kiredi. Bizde jeti kassa jumys isteidi, biz kassada 2-3 klient bolmaýyn qadaǵalaimyz. Sonymen qatar dáliz tolyǵymen dezinfektsiialaý quralymen óńdelgen. Zal boiynsha sanitaizerler ornatyldy. Klientter dúkenge tek maskamen kiredi. Saǵat saiyn barlyq jumys aýmaǵy, arbalar ár qoldanystan keiin óńdeledi», – dep atap ótti O. Sýhorýkova.
Sanitarlyq normalar men karantin rejimin saqtamaǵan jaǵdaida elordada nysandardyń qyzmeti toqtatylady. Elordada koronavirýstyń taralýyna jol bermeý maqsatynda qatań erejeler qabyldandy.
