Nur-Sultanda biiktigi 6 metrlik eko-shyrshany toqý boiynsha fleshmob bastaý aldy. Búginde chellendjge elimizdiń búkil óńirinen eriktiler jumylýda. Bul týraly elorda ákimdiginiń Ishki saiasat basqarmasy habarlady.
«Karantindik shekteýler men oqshaýlaý qol qýsyryp otyrýǵa sebep emes. Úide otyryp, shyǵarmashylyqpen ainalysa alasyz, ómir boiy armandaǵan nárseni úirene alasyz. Toqylǵan jyly shyrsha adamdardy biriktiredi – jańajyldyq atmosferany týdyryp, 2021 jyldy jumyla qarsy alýǵa múmkindik beredi», - dep atap ótti aktsiia uiymdastyrýshysy, áleýmettik kásipker Rahima Muqysheva.
«Biyl bizge Nur-Sultan qalasynyń ákimdigi qoldaý kórsetti. Biz toqyma jip satyp aldyq. Demeýshiler de paida bolady. Bul joly aktsiiaǵa Petropavl, Atyraý jáne Taraz qosyldy. Búkil Qazaqstan shyrshany jumyla toqyp jatyrmyz. Sonymen qatar, mektepter de qatysýda. Biz qazir «Qoldaý« qoǵamdyq birlestigimen jumys istep jatyrmyz, olar qazirdiń ózinde mektepterge sheberlik synyptaryn uiymdastyrýda», - dedi Rahima Muqysheva.
Jańa jylǵa arnalǵan erekshe shyrsha bólshektelip toqylyp, keiin biriktiriledi. Oǵan barlyq azamat qatysa alady. 19-25 jeltoqsan aralyǵynda kún saiyn saǵat 10:00-den 15:00-ge deiin «Báiterek» monýmentiniń ishinde barlyq sanitarlyq normalar saqtala otyryp, toqýdan sheberlik synyptary ótkiziledi.
«Quraq kórpe stilindegi eko-shyrsha» jobasy daǵdarys kezeńindegi ózekti máselelerdi sheshýge kómektesedi. Olardyń biri – jastardy, ásirese az qamtylǵan, jumyssyz, múgedek jáne áleýmettik osal toptardyń basqa da sanattaryndaǵy jastardy oqýǵa, qosymsha tabys tabýǵa, úiden jumys isteýge, shaǵyn óndiristi jáne kreativti ekonomikany damytýǵa yntalandyrý. Sonymen qatar, toqý jumystary paidaly demalys syilap, stress pen depressiiany jeńildetýge kómektesedi.
Toqyma jipten jasalǵan jańa óner týyndysynyń biiktigi 6 metr bolmaq. Toqyma áshekeilerdi jasaýǵa mektep oqýshylary men olardyń ata-analary, qarttar úiiniń zeinetkerleri, balalar úileri, qoǵamdyq qorlar qatysady. Shyrshany bezendirýge arnalǵan zattar da 20/20 santimetr túrli-tústi toqylǵan kvadrattardan jasalǵan.
Joba aiasynda shyrsha bólshekterin eń kóp toqyǵan rekord iesi anyqtalatyn bolady. Sondai-aq qundy syilyqtar men lotereia oinatylady.
Fleshmobty Nur-Sultan qalasy ákimdiginiń qoldaýymen «Pýt masterstva» qoǵamdyq qory men «Bergen» áleýmettik sheberhanasy uiymdastyrýda. Joba «Rýhani jańǵyrý» ulttyq baǵdarlamasy aiasynda Qazaqstandaǵy eriktiler jylyna arnalǵan.
