4-6 qyrkúiek kúnderi elordada Aziia elderi qalamgerleriniń tuńǵysh forýmy ótedi, dep habarlaidy "Ult aqparat" QazAqparat agenttigine silteme jasap.
Bul týraly Qazaqstan Jazýshylar odaǵynyń tóraǵasy Ulyqbek Esdáýlet ortalyq kommýnikatsiialar qyzmetinde ótken brifingte aitty.
«Áýelde bul forýmǵa japoniialyq, túrkiialyq Nobel syilyǵynyń laýreattary shaqyrylǵan. Ókinishke orai, olar kele almady. Esesine Ońtústik Koreia, Katar jáne Túrkiia elderinen 3 nominant kele jatyr. Qurlyqta 45 memleket bar. Sonyń 44-inen jazýshy shaqyrǵanbyz. Qazir 35 elden 80-ge jýyq jazýshy kele jatyr. Uiymdastyrý jumysyna memleket ózi járdem berip, qoldaý kórsetip otyr. Memlekettik hatshy Marat Tájin myrza sharany uiymdastyrýǵa tikelei atsalyssa, Memleket basshysy forýmnyń ashylýyna qatyspaqshy. Osynyń ózi ádebietke degen oń kózqaras qalyptasqanyn kórsetedi», - dedi Ulyqbek Esdáýlet.
QR Mádeniet jáne sport vitse-ministri Nurǵisa Dáýeshov atalmysh forýmdy 3 jylda bir ret ótkizý usynylatynyn aitady.
«Aziia qalamgerlerine osy forýmdy 3 jyl saiyn ártúrli memlekette ótkizýdi usynbaqpyz. Sondai-aq, Aziia jazýshylary komitetin quryp, shtab páterin Nur-Sultan qalasynda ashýdy josparlap otyrmyz. Aýdarma isine, sonyń ishinde qazaq avtorlaryn Aziia tilderine aýdarý boiynsha da naqty usynystarymyz bar. Forým barysynda osy taqyryptarda pikir almasyp, kelissózder júrgizemiz», - dedi ministrlik ókili.
Qazaqstan Jazýshylar odaǵy tóraǵasynyń orynbasary Aqberen Elgezektiń aitýynsha, 2 kúnge sozylatyn shara barysynda paidaly dárister men ashyq pikirtalastar uiymdastyrý josparlanǵan.
«Forým jumysy 3 kúnge sozylady. Erteń plenarlyq otyrysy ótedi. Eki bólimde 11 spiker baiandama oqidy. Kelesi kúni TED.9 formatynda arnaiy shara ótedi. Onda 10 spiker dáris oqyp, erkin formatta suhbattasady. Sondai-aq, Abai kóshesiniń boiynda «Qalamgerler alleiasy» ashylady. Shara aiasynda Ortalyq Aziia qalamgerleriniń kezdesýi ótedi. Onda Uly Jibek joly boiyndaǵy ádebiettiń bolashaǵy týraly aityldy. Forým sheńberinde jas Aziia qalamgerleriniń kezdesýi de josparlanǵan», - deidi ol.
QR Prezidenti ákimshiligi men QR Mádeniet jáne sport ministrliginiń qoldaýyman ótetin shara 4-6 qyrkúiek kúnderine josparlanǵan. Forýmǵa Nobel syilyǵynyń nominanttary, Býker jáne ASEAN syilyqtarynyń laýreattary, jazýshylar odaqtary men qaýymdastyqtarynyń tóraǵalarynan quralǵan 90 qonaq keledi degen jospar bar.
