Elordada ańyzǵa ainalǵan ánshi Álibek Dinishevtiń mereitoilyq kontserti ótti, dep habarlaidy QazAqparat Astana opera teatryna silteme jasap.
QazKSR jáne KSRO Halyq ártisi, QR Memlekettik syilyqtarynyń laýreaty, Qazaqstannyń Eńbek Eri, áigili tenor Álibek Dinishev 22 qazanda «Astana Opera» sahnasynda mereitoilyq kontsertpen óner kórsetti. Shyǵarmashylyq keshti QR Mádeniet jáne sport ministrligi ótkizdi. Súiikti ónerpazyn sahnadan jibergisi kelmegen kórermen qaýym úshin ánshi mýzykalyq shliagerge ainalǵan týyndysyn biske tamasha oryndap berdi.
Mazmundy baǵdarlamaǵa «Astana Opera» teatrynyń hory jáne Qazaqstannyń eńbek sińirgen qairatkeri Aleksandr Beliakovtyń jetekshiligimen Almaty qalasy ákiminiń estradalyq-simfoniialyq orkestri qatysty.
Álibek Dinishev barshaǵa súiikti «Liýbliý tebia, moi krai rodnoi…» ánimen kontserttiń shymyldyǵyn ashty. Sondai-aq jinalǵan jurt Álibek Musaulynyń tamasha oryndaýyndaǵy Abaidyń «Jelsiz túnde jaryq-ai», Jaiaý Musanyń «Aqsisa», «Aqbaqai» halyq ánderine joǵary baǵasyn berdi. Zaldaǵy kórermender M.Blanter, I.Selvinskiidiń «Za vysokimi gorami», V.Solovev-Sedoi, M.Isakovskiidiń «Ýslysh menia, horoshaia», A.Babadjanian, R.Rojdestvenskiidiń «Zimniaia liýbov», A.Babadjaniannyń «Zagadai jelanie» siiaqty tanymal shyǵarmalardy ataqty ártispen birge qosylyp shyrqady.
Budan bólek, kesh baǵdarlamasynda Dj.Kachchinidiń «Ave Maria», F.P.Tosti, G.D’Annýntsionyń «’AVucchella», A.Laranyń «Solamente una vez» jáne taǵy basqa batys eýropalyq repertýardyń kóptegen ánderi usynyldy.
Kórermen qaýym súiikti ártisin uzaq ýaqyt boiy sahnadan jibermedi: «Bravo», «Bis» degen daýystar zaldyń barlyq buryshynan estilip jatty, al ataqty tenor óz ónerine tabynýshylarǵa arnap, K.Velaskezdiń «Besame mucho» ánin shyrqady. Tyńdarmandar opera sahnasynyń ańyzyna ainalǵan tulǵasyna tik turyp qoshemet kórsetti.
