Nur-Sultan qalasy bilim basqarmasy basshysynyń orynbasary Rimma Imanǵazinova balalardyń quqyǵyn qorǵaý baǵytyndaǵy mańyzdy jumystar týraly aitty, dep habarlaidy QazAqparat.
Basqarma ókiliniń aitýynsha balalardyń jumysqa jegilýin boldyrmaý úshin memlekettik organdar ata-analarmen túsindirý jumystaryn júrgizedi. Jasóspirimderdiń quqyǵyn qorǵaý baǵytynda memlekettik áleýmettik tapsyrys ta qarastyrylǵan.
«Memlekettik tapsyrys aiasynda sondai-aq balalardyń qylmysynyń aldyn alýǵa baǵyttalǵan aqparattyq materialdar men videorolikter ázirlenip, jedel sharalar uiymdastyrylady. Balalar men ata-analardyń qatysýymen sharalar ótkiziledi. Qamqorshylyq organdary ata-ananyń qaraýynsyz qalǵan nemese baqylaýsyz ketken balalardy anyqtaidy. Osy maqsatta ár mektepte áleýmettik pasport toltyrylady. Muǵalimder óz kezeginde balalary eńbekke tartylýy múmkin otbasylardyń tizimin beredi», - dedi spiker.
Sonymen qatar, orta bilim berý baǵdarlamasy aiasynda áleýmettik turǵydan az qamtylǵan otbasylardyń balalaryna kómek kórsetiledi.
«Áleýmettik sebeptermen balalardyń oqýǵa barmaýyn boldyrmaý úshin jalpy orta bilim berý aiasynda áleýmettik álsiz sanattaǵy balalarǵa kómek kórsetiledi. 2019-2020 oqý jylynda baǵdarlama boiynsha kómek 12 690 bala aldy (ár balaǵa 30 myń teńge kóleminde sertifikat berilgen).
Sondai-aq, jyl boiy biz balalarǵa «Mektepke jol» aktsiiasy aiasynda kómek kórsetemiz. 2019 jyly aktsiianyń kómegimen 11 myńnan astam bala qamtyldy. Osy jyldyń basynan bastap 2 myńnan astam bala kómek aldy. Balalarǵa ýaqtyly kómek kórsetý úshin Nur-Sultanda Qiyn ómirlik jaǵdaidaǵy balalardy qoldaý ortalyǵy jumys jasaidy. Qalada kámeletke tolmaǵandardyń bos ýaqytyn uiymdastyrý maqsatynda 11 qosymsha bilim berý mekemesi bar, 136 filial jumys isteidi», - deidi ol.
