Elordadaǵy Oqýshylar saraiynda ál-Farabi ortalyǵy ashyldy. Saltanatty sharaǵa qoǵam qairatkerleri, ǵalymdar jáne sarai qyzmetkerleri qatysty, dep habarlaidy QazAqparat.
«Ál-Farabi ortalyǵynyń negizgi maqsaty - búgingi jas urpaqqa álemniń ekinshi ustazy atanǵan Ábý-Nasyr ál-Farabi babamyzdyń sońynda qalǵan mol murasyn, ǵylymdaǵy murasyn, tárbie, mýzyka salalaryndaǵy barlyq eńbekterin jinaqtap, oqýshylarǵa túsindirip jetkizý. Abai babamyz «Bolmasań da uqsap baq, bir jaqsyny kórseńiz» dep aitqanyndai, ál-Farabi babamyzdyń árbir jaqsy qasietin balalardyń boiynan kórgimiz keledi. Shynynda da ol adam tańǵalatyn, osyndai da múmkindik adam balasynda bolady eken-aý dep tańdai qaǵatyn tulǵa», - dedi saltanatty sharada sóz sóilegen ál-Farabi atyndaǵy Oqýshylar saraiynyń direktory Erbol Irgebai.
Al L.Gýmilev atyndaǵy Eýraziia ulttyq ýniversitetiniń prorektory, fililolgiia ǵylymdarynyń doktory Dihan Qamzabekuly ál-Farabi murasyn elimde nasihattaý jumystarynyń bastaýyna kimder boldy degen másele tóńireginde zertteý júrgizý qajettigin aitady.
«Esterińizde bolsa, ál-Farabi týraly Maǵjannyń óleńderine de bar. Ekinshi Aǵjan Mashani degen kisi bolǵan. Marksheider mamandyǵyn ielengen ol Almatydaǵy politehikalyq institýtta kóp jyl sabaq bergen. Sol kisi Qanysh Sátbaevpen kelise otyryp. 50-60-shy jyldary ál-Farabi murasyn jinaǵan. Ǵulamanyń jatqan jerine baryp, quran oqyǵan. Mine osyndai tulǵalarymyz jaiynda da bilýimiz qajet»,- dedi ol.
Jazýshy, farabitanýshy ál-Farabi týraly «Ǵulama ǵumyr» dramasynyń avtory Joltai Álmashuly ǵulama ǵalymnyń qazaq halqy úshin erekshe bolatyn eki qyryna toqtaldy.
«Birinshisi - Ábý-Nasyr ál-Farabi álem moiyndaǵan, álemdegi ekinshi ustaz degen atqa ie bolǵan ǵulama ǵalym. Búkil ǵylymi orta, ziialy qaýym Aristotelden keiin ekinshi ustaz dep qabyldaǵan shyǵar. Al biz úshin she? Orta Aziia, Qazaqstan úshin Ábý-Nasyr ál-Farabi qai ýaqytta da birinshi ustaz bolyp qalýy kerek. Ekinshiden, biyl biz Ábý-Nasyr ál-Farabidiń 1150 jyldyǵymen qosa, hákim Abaidyń 175 jyldyǵyn toilap jatyrmyz. Osy oraida Abaidyń ustazy kim degende múdire beretin edik. Endi qazir biz emin-erkin Abaidyń ustazy Ábý-Nasyr ál-Farabi dep aitýǵa haqylymyz dep oilaimyn. Maǵjani degen ǵulama bolǵan. Ol ál-Farabi eńbekterimen jaqsy tanys bolǵan. Onyń shákirtteri Semeige kelip, dáris bergen. Sol shákirtterden Abai dáris alǵan. Demek, Abai óz zamanynda Ábý-Nasyr ál-Farabidi tanydy, bildi, eńbekterimen tanys boldy dep aita alamyz», - degen qalamger ortalyqqa óziniń «Ǵulama ǵumyr» kitabyn tartý ótti.
Aita keterligi, osy shara aiasynda Oqýshylar saraiynda Ábý-Nasyr ál-Farabidiń keýde músininiń ashylý saltanaty da ótti. Ǵulama ǵalymnyń keýde músinin Nur-Sultan qalalyq sýretshiler odaǵynyń basqarma tóraǵasynyń orynbasary Baqytjan Áripov jasaǵan.
