Nur-Sultan qalasynda «Aqyndar aýyldy jyrlaidy» atty ádebi-poetikalyq keshi ótti. Is-sharaǵa «Aýyl» Halyqtyq-demokratiialyq patriottyq partiiasynyń tóraǵasy Áli Bektaev, QR Parlamenti Májilisiniń depýtattyǵyna kandidattar Dáýletkerei Kápuly men Zeiin Álipbek qatysty, dep habarlaidy "Ult aqparat".
Sonymen qatar, rýhani keshke partiianyń 2017 jyldan beri jyl saiyn ótkizip kele jatqan «Aýylym - altyn tuǵyrym» onlain-baiqaýynyń jeńimpazdary men qatysýshylary da jinaldy. Atalǵan baiqaýdyń basty maqsaty – ulttyq qundylyqtardy dáripteý jáne aýyldyń rýhani ómirin, tynys-tirshiligin, aýylda bolyp jatqan áleýmettik-ekonomikalyq protsesterdi sipattaý arqyly ulttyq qundylyqtardy nasihattaý.
Partiianyń baspasóz qyzmetinen málim etkendei, konkýrs 2017-2020 jyldary arasynda 4 ret ótkizilip, myńnan astam esse, óleńder men dramalar partiia qorjynyna túsken. Solardyń barlyǵy 12 tomdyq jinaqqa enip, kitap bolyp jaryq kórdi.
Aqyn, ádebiettanýshy Dáýletkerei Kápulynyń aitýynsha, ulttyq negiz, ulttyq bolmys haqyndaǵy tolǵamnyń kórinisin aqyn-jazýshylardyń shyǵarmasynan kerýge bolady. Qazaqtyń sóz óneri yqylym zamandardan qalyptasyp, rýhani negizimizge ainalyp, ult retindegi tanym-túsinikten, bolmys-bitimnen, tutastyqtan esh ýaqytta ajyramai keldi. Jyraýlardyń tolǵaýlary, jyrshylardyń tókpesi, tipti kúishilerdiń saýsaǵynan tógilgen kúmbirli kúidiń ózinde ulttyq nár, ulttyq boiaý, ulttyq saryn men ulttyq qundylyq ajyramai, birtutas, úndesip turady.
Onyń oiynsha, qazaq halqynyń bir ereksheligi onyń ulttyq bolmysy men turmys-tirshiligi, ult retindegi salt-sanasy, dúnietanymy, tipten oilaý júiesi, is-áreketi de bir-birimen astasyp, sabaqtasyp jatqandyǵynda.
Poeziialyq kesh barasynda Á. Serikbai, T. Mergenbai, Á. Dúisenbai, R. Qabidollin, A. Aqjigit, K.Aitbaev qatarly aqyndar Táýelsizdik kúnine arnalǵan jyrlaryn oqydy.
Ózge de aqyndar óleńderin oqyp, ánshiler dombyrada ánnen shashý shashty.
Jas aqyn-jazýshylar partiia qataryn tolyqtyryp, múshelikke ótti.
