Elordada 3,5 myń adam 42 500 teńge áleýmettik kómek ala bastady. Bul týraly Úkimet otyrysynda Nur-Sultan qalasynyń ákimi Altai Kólginov aitty, dep habarlaidy "Ult aqparat".
«Memleket basshysynyń daǵdarysqa qarsy qabyldaǵan sharalary biznesti damytýǵa jáne halyqty jumyspen qamtýǵa qoldaý bolatyndyǵy sózsiz. Jumyspen qamtýdyń jol kartasyna engiziletin jobalar anyqtalyp, olar salalyq ministrliktermen kelisildi. Jumyspen qamtýdyń jol kartasyn iske asyrý barysynda ekonomikanyń naqty sektorynda shamamen 15 myń jumys ornyn qurý josparlanǵan. Jol kartasy aiasynda 16 ońaltý ortalyǵyn salý, mektepter, joldar, injenerlik jelileri salý, gazdandyrý, aýla aýmaqtary men qoǵamdyq keńistikti abattandyrý, áleýmettik nysandardy jóndeý jumystary qarastyrylǵan. Atalǵan jobalardy júzege asyrylýy ekonomikanyń damýyna, azamattardy jumyspen qamtýǵa oń áserin tigizedi», - dedi qala basshysy.
Onyń atap ótýinshe, qurylys salasy ekonomika ósiminiń negizgi draiveri biri sanalady.
«Karantin blok-beketterinde azyq-túlik taýarlarynan basqa inertti jáne basqa da qurylys materialdary kedergisiz ótkiziledi. Karantin engizilgennen bastap, qalaǵa 5 myń tonnaǵa jýyq qurylys materialdary jáne 4,5 myń tonna jol jóndeýge arnalǵan materialdar jetkizildi. Qurylys alańdaryna jumysshylarǵa arnalǵan jataqhanalary bar qurylys kompaniialary óz qyzmetin jalǵastyrýda. Sonymen birge qurylys kompaniialarynyń barlyq basshylaryna sanitarlyq normalardy qatań saqtaý tapsyryldy. Baqylaýǵa alyndy», - dedi elorda ákimi.
Altai Kólginovtiń atap ótýinshe, Memleket basshysynyń daǵdarysqa qarsy sharalarynyń aiasynda azamattardy qoldaý boiynsha jumys bastalyp ketti.
«Áleýmettik tólem alýshylar tizimi keńeitildi. Jumys berýshilerden búgingi tańda 12 myńnan astam ótinim kelip tústi. Onyń 3 500 ótinishi qaralyp, tólem bastaldy. Taǵy 4 myńǵa jyq jumys berýshiler jumyspen qamtý ortalyǵyna júgindi. Barlyq protsester aitarlyqtai jeńildetilgen», - dedi ol.
