Keshe elordada oryn alǵan 2 órt saldarynan eki adam qaza tapty. Bul týraly Nur-Sultan qalalyq TJD Memlekettik órt baqylaý basqarmasynyń bastyǵy Erkin Otarǵalymuly aitty, dep habarlaidy "Ult aqparat".
«Búgingi tańda 24 myńnan astam jeke turǵyn úidi aralap, turǵyndarmen órt qaýipsizdigi taqyrybynda túsindirý jumysy júrgizildi. Degenmen, statistikalyq málimetterge qaraityn bolsaq, turǵyndardyń barlyǵy birdei qaýipsizdik erejesin saqtai bermeidi. Jylytý maýsymyndaǵy órttiń shyǵý sebebiniń biri peshterdiń órt qaýipsizdigi erejelerine sai paidalanylmaýy bolyp otyr. Bul rette qala turǵyndary men qonaqtaryna jylý peshterin shamadan tys qyzdyrmaýǵa keńes beremiz. Iaǵni, peshti tálik ishinde 1 ret emes birneshe ret jaqqan abzal ekenin eskertemiz», - dedi ol.
Onyń aitýynsha, mektepter men balabaqshalar jumysyna engizilgen shekteýge bailanysty balalardy úide jalǵyz qaldyrmaý kerek. Janyp jatqan peshti balalarǵa baqylap otyrýǵa tapsyrmaǵan jón.
«Sonymen qatar turǵyndar úilerin jylytý úshin elektr jylytqyshtardy paidalanady. Mundai quraldarda qyzǵan kezde avtomatty túrde óshiretin rettegishi bolýy jáne radiatorynda mai bolýy tiis», - dedi Erkin Otarǵalymuly.
Basqarma bastyǵynyń dereginshe, keshe ǵana elordada 2 órt tirkelip, 2 adam qaza tapqan. Birinshi oqiǵada ishimdikke mas bolǵan er adam temeki shegip jatyp uiyqtap ketse, ekinshisinde órttiń shyǵýyna janyp turǵan maisham sebep bolǵan.
