Nur-Sultan qalasynda qoǵamdyq kólik aqysyn tólemegen 170 myńǵa jýyq jolaýshy anyqtalyp, aiyppul salyndy. Bul týraly City Transportation Systems JShS kóliktik baqylaý departamentiniń menedjeri Azat Tóleýbaev málim etti, dep habarlaidy QazAqparat tilshisi.
«Biyl jyl basynan beri kóliktik baqylaý departamentiniń qyzmetkerleri qoǵamdyq kólik aqysyn tólemegen 170 myńǵa jýyq jolaýshyny anyqtady. Onyń ishinde 8 myń adamǵa ákimshilik hattama toltyrylyp, aiyppul salyndy. Jol aqysyn tólemegeni úshin 2 AEK nemese 5834 teńge kóleminde aiyppul qarastyrylǵan», - dedi Azat Tóleýbaev.
Sondai-aq, CTS ókili avtobýs aqysyn tólemegen 170 myńǵa jýyq jolaýshynyń nelikten tek 8 myńy ǵana jaýapqa tartylǵanyn aitty.
«Bul jerde másele adamgershilikte. Kei jolaýshylar tólemaqy jasaýdy umytyp ketedi, keibiriniń interneti istemei qalady, taǵy sol siiaqty. Ondai jaǵdaida túsinistikpen qarap, eskertý jasai otyryp, jolaqyny tóleýin suraimyz. Jalpy bizdiń mindet - qoǵamdyq kólik aqysyn tólemegen jolaýshyny anyqtaý ǵana, odan ári máselemen tártip saqshylary ainalysady», - deidi ol.
Onyń aitýynsha, avtobýs aqysyn kóbine jastar jaǵy tólemei jatady.
