Elordalyq politseiler kópqabatty úiden sekirmek bolǵan jasóspirimdi qutqardy, dep habarlaidy "Ult aqparat" Polisia.kz Telegram-arnasyna silteme jasap.
Saǵat 13.00-de politsiianyń "102" arnasyna kýágerlerden Qaldaiaqov kóshesindegi úidiń 15-shi qabatynda er adam terezeden aiaǵyn salbyratyp, sekirýge tyrysyp jatqany týraly aqparat kelip túsken.
Oqiǵa ornyna quramynda aǵa leitenant Aibek Dúisenov pen kapitan Muratbek Omarbekov bar Astana qalasy Politsiia departamentiniń Patrýldik politsiia polkiniń jasaǵy jiberilgen.
Politsiia qyzmetkerleri tez arada joǵary qabatqa kóterilip, esikterdi qaǵa bastaǵan. Oqiǵa oryn alǵan páterdiń esigin qyz ashyp, jaǵdai týraly politseilerden estigen. Tártip saqshylary qalyptasqan jaǵdaidy baǵdarlai otyryp, páterge júgirip kirgen jáne jigittiń qozǵalǵan sátin paidalanyp, terezeni ashyp, ony ishke qarai tartyp kirgizgen.
17 jastaǵy jigitti mundai is-áreketke ne itermelegeni anyqtalyp jatyr. Psihologtarmen birlesip profilaktikalyq jumys júrgizildi jáne ol zańdy ókilderine tabystaldy.
