Elordada 103 qyzmetine qońyraý shalýshylar 4 ese artyp ketti. Bul týraly Nur-Sultan qalasynyń qalalyq jedel meditsinalyq járdem stansasynyń direktory Murat Orazbaev aitty, dep habarlaidy "Ult aqparat".
«Búgingi tańda 103 qyzmetiniń júktemesi artty. Maýsym aiynan bastap qońyraýlar sany 4 ese ósti. Kúnine Nur-Sultan qalasynyń turǵyndarynan 4 myńnan astam qońyraý túsedi. Shaqyrtýlar sany 2 ese ósti. Iaǵni, kúnine shamamen shyǵý brigadasy 5 myńǵa jýyq qala turǵynyna meditsinalyq kómek kórsetedi. Bul - úlken júkteme», - dedi ol.
Onyń atap ótýinshe, 103 qyzmetine júktemeniń artýyn bailanysty 103 pýltiniń sany arttyrylyp, Nur-Sultan qalasy turǵyndaryna 70-51-03 nómiri boiynsha call-ortalyq uiymdastyrylǵan. Qala turǵyndary osy nómirge qońyraý shalý arqyly koronavirýs infektsiiasymen bailanysty barlyq saýaldaryna jaýap ala alady.
Sonymen qatar, stansa direktory elorda turǵyndary tarapynan jedel meditsinalyq járdem kóliginiń shaqyrtýlarǵa óte kesh keletindigine qatysty shaǵymdaryna jaýap berdi.
«Keshigip barǵan shaqyrtýlardyń da bar ekendigin jasyrmaimyn. Paiyzdyq úlesi 5 paiyzǵa deiingi aralyqty quraidy. Bul ruqsat etilgen shek. Árbir elordalyq jedel kómek ózine tez arada kelgenin qalaityndyǵyn túsinemin. Osy rette árbir shaqyrtý jedel meditsinalyq kómek dispetcheri deńgeiinde 4 sanatqa bólinetindigin jáne ár sanattyń ýaqyt jáne kelý reglamenti bar ekendigin atap ótkim keledi», - dedi Murat Orazbaev.
