Nur-Sultan qalasynyń Oqýshylar saraiynyń direktory Erbol Irgebai 12 myń bala oqyp, bilim alyp jatqan uiymnyń jumysy týraly baiandap berdi, dep habarlaidy QazAqparat.
«Búgingi tańda Oqýshylar saraiynda 12 myńnan astam bala bilim alady. 125 túrli sektsiia men úiirme jumys istep tur. Bizdiń Oqýshylar saraiynyń ereksheligi: ǵylym men tehnika, óner, mádeniet salasy jáne sport – úsh baǵyt qatar damyp kele jatyr. Sport salasynda fýtbol, hokkei, sýda júzý, jeńil atletika, boks, sadaq atý, kúres túrlerinen úiirmeler bolsa, óner salasynda horeografiia, án aitý, sýret salý, keramika úiirmelerinde de bilikti mamandar men muǵalimder jumys isteidi. Balalardyń qyzyǵýshylyǵy joǵary. Taiaýda bizdiń saraida «Prezidenttik shyrsha» saltanatty sharasy ótkizildi», - dedi ol májilismenderdiń Oqýshylar saraiyn aralaýy kezinde tilshilerge.
Erbol Irgebaidyń aitýyna qaraǵanda, Oqýshylar saraiynda robot tehnikasy, kibersport, túrli tehnikalyq ortalyqtar – avtomodeldeý, sýda modeldeý, ǵaryshtyq tehnikany modeldeý, himiia-fizika baǵyttarynda úiirmelerge oqýshylar kóp keledi.
«Endigi maqsattyń biri – ǵylym men tehnika baǵytyndaǵy «Týmo» ortalyǵyna negizdelgen «Sana» degen baǵdarlama jasaǵanbyz. Iaǵni, balalar tsifrlyq tehnologiialardy damytýǵa bailanysty daǵdylaryn shyńdap, ózderi baǵdarlama jasaýǵa úirenedi», - dedi Erbol Irgebai.
Oqýshylar saraiynyń direktory óz sózinde qandai máseleler baryn da jasyrǵan joq.
«Qiyn problema bizde – basseinde. Qala úshin bizdiń bassein, tipti jalpy, bir ǵana Oqýshylar saraiynyń ózi qalaǵa azdyq etedi. Óitkeni, elordanyń 1 millionnan astam turǵyny bar. Jalpy, bes kúndik oqý kúni bekitilgendikten, búkil qala boiynsha qosymsha bilim berý uiymdaryn kóbeitý kerek. Sport bolsyn, óner nemese tehnika bolsyn balalarǵa arnalǵan uiymdardy barynsha kóbeitse jaqsy bolar edi. Qaladaǵy árbir aýdanǵa bir-bir bassein salyp qoisa jaqsy bolar edi. Sebebi, basseindi búgingi kúni barlyǵy qajet etedi. Tipti omyrtqasy qisaiǵan balalarǵa dárigerler basseinge túsýge keńes beredi. Bizde 1 200 oryn. Odan artyq ala almaimyz. Ata-analar bizge «balalarymyzdy basseinge qabyldamaisyńdar» dep renjidi. Qalada aqyly basseinder bilýimshe, qymbat bolýy kerek. Bizde basseinde ailyq tólem – 10 myń teńge», - dedi ol.
Erbol Irgebai bassein árdaiym tazalanyp otyrýy kerektigin, sanitarlyq normasy baryn, aptasyna bir ret bassein tekserilip otyratynyn aityp ótti.
«Bizde 171 pedagog jumys isteidi. Qosymsha túrli jerden (...) kelip qyzmet atqaratyndar bar. Eger qosymsha bilim beretin pedagogtardyń jalaqysy kóp bolsa, ol bizde turaqty jumys istei alar edi. Jalaqy az bolǵandyqtan, álgi pedagog bizdiń Oqýshylar saraiyna kelip, tústen keiin mýzyka mektebine sabaq berip ketýi múmkin. Osydan baryp sapa tómendeidi. Sondyqtan, qosymsha bilim beretin pedagogtardyń jalaqysy turaqtalsa jaqsy bolar edi», - dedi ol.
Oqýshylar saraiynda úiirmeler biýdjettik jáne aqyly dep ekige bólinedi. 12 myń balanyń 8500-y biýdjettik toptarda (kópbalaly nemese az qamtylǵan otbasylardyń balalary) oqidy.
