Elordadaǵy Highvill turǵyn úi kesheniniń liftinde er adam toqqa túsip jazym bola jazdaǵan, dep habarlaidy "Ult aqparat".
«Astana – Chto? Gde? Kogda?» Telegram-kanalynyń jazýynsha, kýrer jigit Highvill turǵyn úi kesheniniń turǵynyna tapsyrys boiynsha gúl aparyp, tómen túsý úshin liftke kiredi. Shyǵar sátte liftegi eki adam batyrmany qatar basqan. Osy kezde kýrer qasyndaǵy adamdy toq soǵyp, denesi bir sát jansyz qalǵanyna kýá bolǵan. Jigit onyń qolyn toq soqqan batyrmadan qorappen ulǵylap júrip ajyratady.
«Abyroi bolǵanda ol meni toqtan ajyratyp úlgerdi. Al men dármensiz kúide qinalyp jattym. Artynsha esten tanyp aýrýhanaǵa túsippin. Toq keri serpigen kezde sátsiz qulasam kerek, qos iyǵym shyǵyp, eki jaýyrynym synyp ketipti», – dep eske alady zardap shegýshi.
Ol lifttegi aqaýǵa jaýapty adamdarǵa shara qoldanýdy talap etip otyr.
Akademik Batpenov atyndaǵy ortopediia jáne travmatologiia ǵylymi-zertteý institýtynyń baspasóz qyzmeti liftte toqqa túsken naýqastyń jaǵdaiy týraly málimet berdi. Ony Dosbol Ǵalym esimdi dáriger emdegen eken.
«Naýqas bizdiń ortalyqqa 7 tamyz kúni turaqty jaǵdaimen tústi. Eki iyǵy shyǵyp ketken edi. Emdik jáne dári-dármektik protsedýralar túgel jasaldy. 4 kún dárigerlerdiń baqylaýynda boldy. Keshe úige shyǵaryldy», - dep málimet berdi meditsinalyq uiymnyń baspasóz qyzmeti.
Nur-Sultan qalasynyń politsiia departamenti osy oqiǵa boiynsha tergeý bastaǵan kórinedi.
«Atalǵan fakti boiynsha Qylmystyq kodekstiń 306-baby 1-bóligi (qaýipsizdik talaptaryna sai kelmeitin taýarlardy shyǵarý nemese satý, jumystardy oryndaý ne qyzmetterdi kórsetý) boiynsha sotqa deiingi tergeý júrip jatyr. Oqiǵanyń mán-jaiyn túgel anyqtaý úshin qajetti tergeý áreketteri bastaldy», - dep jazdy vedomstvonyń baspasóz qyzmeti.
Osy tergeý aiasynda sot-meditsinalyq saraptama taǵaiyndalyp otyr. Sonyń qorytyndysy boiynsha protsessýaldyq sheshim qabyldanady.
