Aǵymdaǵy jyly elordanyń jylý berý maýsymyna qajetti kómir kólemi 400 myń tonnany quraidy. Bul týraly búgin Astana qalalyq Otyn-energetikalyq kesheni jáne kommýnaldyq sharýashylyǵy basqarmasy basshysynyń orynbasary Baǵdat Baisadyqov aitty, dep habarlaidy QazAqparat tilshisi.
«Jylytý maýsymynda Astanaǵa qajetti kómirdiń kólemi 400 myń tonnany quraidy. Mundai kómir kólemin satýshylar tolyqtai qamtamasyz ete alady. Aita keterligi, atalǵan kólemge Jylý elektr stansalaryna ketetin kómir esepke alynyp otyrǵan joq. Bul tek jeke sektor qajettiligi», - dedi ol.
Sonymen qatar basqarma basshysynyń orynbasary jylytý maýsymyna qansha qarajat bólingendigin de atap ótti.
«Biýdjet jyldyń basynan sońyna deiin bólinedi. Kelesi jylǵy biýdjetti qazir qalyptastyryp jatyrmyz. Kelesi jylǵa arnalǵan memlekettik satyp alý jospary shamamen jyldyń sońynda bekitiledi. Al osy jyldyń sońyna deiin shamamen 6 mlrd teńge josparlanǵan», - dedi Baǵdat Baisadyqov.
Onyń aitýynsha, Astanadan kelip kómirdi Qoiandy, Talapker, Qaraótkel, Qosshy, Qajymuqan aýyldarynyń turǵyndary satyp alady.
«Olardyń arasynda alypsatarlar da, turǵyndar da bar. Ókinishke orai búgingi kúni kómir kenishterinen qatty otyndy tutynýshylarǵa deiin jetkizý zańnamalyq deńgeide rettelmegen. Bul jergilikti atqarýshy organdarǵa da, ortalyq organdarǵa da bekitilmegen», - dedi basqarma basshysynyń orynbasary.
Sonymen qatar Baǵdat Baisadyqov elordada 20 táýlikke jetetin otyn qorynyń bar ekendigin aitqan bolatyn. Al Astana qalalyq otyn-energetikalyq kesheni jáne kommýnaldyq sharýashylyǵy basqarmasynyń bólim bastyǵy Maqsat Ysmaǵulov kómir alypsatarlarymen kúres júrgizilip jatqanyn atap ótti.
