Elorda mańynda ornalasqan ziratty sý alyp ketýi yqtimal. Bul týraly qalalyq Baiqońyr aýdany ákiminiń orynbasary Erlan Jaýlybaev málim etti, dep habarlaidy "Ult aqparat".
Nur-Sultan ákimdiginde ótken Qoǵamdyq keńestiń otyrysynda atalmysh máseleni Erlan Jaýlybaev qalalyq Otyn-energetikalyq kesheni jáne kommýnaldyq sharýashylyq basqarmasy basshysynyń mindetin atqarýshy Ernat Bázildiń aldynda kóterdi. Onyń aitýynsha, zirattyń tolyq aýmaǵy basqarmadan Baiqońyr ákimdigine berilmegen.
«Zirattyń syrtynda «Biz de sizdei bolǵanbyz, siz de bizdei bolarsyz» dep jazylyp tur eken. Sondyqtan, myna máseleni kótergim keledi: kóktemde ol ziratqa sý ketedi. Byltyr 9 beiitti sý alyp ketti. Sizder ziratty bizdiń balansqa áli bergen joqsyzdar. Biz 640 gektardyń 63 gektaryn ǵana aldyq. Ol jerge ziratty kim belgilegenin bilmeimin, oiǵa aparyp qoiǵan. Jan-jaǵyn qazyp, qandai da bir jumystar atqarylmasa – kelesi jyly zirattyń bárin sý alady. Kókshetaý-Qostanai ainalma tasjolyndaǵy beiitterdiń sany myńǵa bardy. Bizdiń aýdanda ol máseleni sheshetin aqsha joq», - dedi ol.
Bul máselege bailanysty qalalyq Qoǵamdyq keńestiń tóraǵasy Sansyzbai Esilov Ernat Bázilge sol ziratqa qatysty máseleni arnaiy zerttep qaitýǵa usynys bildirdi. Óz kezeginde basqarma basshysy atalmysh másele qolǵa alynatynyn aityp, jaýap berdi.
