Nur-Sultan qalasy Tótenshe jaǵdailar departamenti bastyǵynyń orynbasary Esen Baiyrov muz ústindegi qaýipsizdik erejelerin túsindirdi, dep habarlaidy "Ult aqparat".
Onyń sózine qaraǵanda, qala aýmaǵyndaǵy Esil ózeniniń uzyndyǵy 32 shaqyrymdy quraidy. Qys mezgilinde sý betin muz basqandyqtan, bul turǵyndarǵa qaýip tóndiredi.
«Elorda turǵyndary men qonaqtarynyń qaýipsizdigin qamtamasyz etý úshin departament qyzmetkerleri jergilikti atqarýshy organdarmen birlesip, «Abailańyz, juqa muz!» jáne «Muzǵa shyǵýǵa tyiym salynady!» siiaqty arnaiy tyiym salatyn belgilerin ornatty. Osy oraida 65 belgi qoiyldy.
Sonymen qatar, qalalyq bilim basqarmasymen ózara is-qimyl barysynda qysqy kezeńdegi tótenshe jaǵdaidyń aldyn alýǵa, úsik shalǵan kezde alǵashqy meditsinalyq kómek kórsetýge baǵyttalǵan interaktivti sabaqtar ótkizilýde», - dedi E. Baiyrov elora ákimdiginiń baspasóz ortalyǵynda.
Onyń aitýynsha, departamenttiń aýdandyq bólimsheleri qosymsha ańshylyq dúkenderde reidter júrgizdi, onda kelýshiler ári dúken ákimshiligi ókilderimen túsindirý sharalary ótkizilip, jadynama men kitapshalar taratyldy.
«Muzdyń qalyńdyǵy 10 sm-den kem bolmaǵanda onyń ústimen qaýipsiz ótý múmkindigi bar, adamdar bir-birinen 5-6 metr qashyqtyqta júrýi kerek. Qarama-qarsy qozǵalys kezinde birdei araqashyqtyqty saqtaý kerek. Eger 4-5 adamnan turatyn top jinalsa, onda siz qalyńdyǵy 15 sm-den kem emes muz boiymen júre alasyz. Barlyq jaǵdailarda, jaǵadan muzǵa shyqpas buryn, ainalańyzdy muqiiat qarap, qaýipsiz jerlerdi tańdap, qozǵalys baǵytyn belgilep alý kerek», - dedi maman.
«Muzdyń qalyńdyǵyn aiaqpen teýip tekserýge qatań tyiym salynady! Muzdyń beriktigin tek súimen nemese taiaq kómegimen tekserýge bolady. Eger birinshi soqqydan keiin muz jarylyp, oǵan sý paida bolsa, siz dereý toqtap, kelgen izben oralýyńyz kerek», - dedi Esen Baiyrov.
