نۇر-سۇلتان قالاسى تٶتەنشە جاعدايلار دەپارتامەنتٸ باستىعىنىڭ ورىنباسارى ەسەن بايىروۆ مۇز ٷستٸندەگٸ قاۋٸپسٸزدٸك ەرەجەلەرٸن تٷسٸندٸردٸ, دەپ حابارلايدى "ۇلت اقپارات".
ونىڭ سٶزٸنە قاراعاندا, قالا اۋماعىنداعى ەسٸل ٶزەنٸنٸڭ ۇزىندىعى 32 شاقىرىمدى قۇرايدى. قىس مەزگٸلٸندە سۋ بەتٸن مۇز باسقاندىقتان, بۇل تۇرعىندارعا قاۋٸپ تٶندٸرەدٸ.
«ەلوردا تۇرعىندارى مەن قوناقتارىنىڭ قاۋٸپسٸزدٸگٸن قامتاماسىز ەتۋ ٷشٸن دەپارتامەنت قىزمەتكەرلەرٸ جەرگٸلٸكتٸ اتقارۋشى ورگاندارمەن بٸرلەسٸپ, «ابايلاڭىز, جۇقا مۇز!» جەنە «مۇزعا شىعۋعا تىيىم سالىنادى!» سيياقتى ارنايى تىيىم سالاتىن بەلگٸلەرٸن ورناتتى. وسى ورايدا 65 بەلگٸ قويىلدى.
سونىمەن قاتار, قالالىق بٸلٸم باسقارماسىمەن ٶزارا ٸس-قيمىل بارىسىندا قىسقى كەزەڭدەگٸ تٶتەنشە جاعدايدىڭ الدىن الۋعا, ٷسٸك شالعان كەزدە العاشقى مەديتسينالىق كٶمەك كٶرسەتۋگە باعىتتالعان ينتەراكتيۆتٸ ساباقتار ٶتكٸزٸلۋدە», - دەدٸ ە. بايىروۆ ەلورا ەكٸمدٸگٸنٸڭ باسپاسٶز ورتالىعىندا.
ونىڭ ايتۋىنشا, دەپارتامەنتتٸڭ اۋداندىق بٶلٸمشەلەرٸ قوسىمشا اڭشىلىق دٷكەندەردە رەيدتەر جٷرگٸزدٸ, وندا كەلۋشٸلەر ەرٸ دٷكەن ەكٸمشٸلٸگٸ ٶكٸلدەرٸمەن تٷسٸندٸرۋ شارالارى ٶتكٸزٸلٸپ, جادىناما مەن كٸتاپشالار تاراتىلدى.
«مۇزدىڭ قالىڭدىعى 10 سم-دەن كەم بولماعاندا ونىڭ ٷستٸمەن قاۋٸپسٸز ٶتۋ مٷمكٸندٸگٸ بار, ادامدار بٸر-بٸرٸنەن 5-6 مەتر قاشىقتىقتا جٷرۋٸ كەرەك. قاراما-قارسى قوزعالىس كەزٸندە بٸردەي اراقاشىقتىقتى ساقتاۋ كەرەك. ەگەر 4-5 ادامنان تۇراتىن توپ جينالسا, وندا سٸز قالىڭدىعى 15 سم-دەن كەم ەمەس مۇز بويىمەن جٷرە الاسىز. بارلىق جاعدايلاردا, جاعادان مۇزعا شىقپاس بۇرىن, اينالاڭىزدى مۇقييات قاراپ, قاۋٸپسٸز جەرلەردٸ تاڭداپ, قوزعالىس باعىتىن بەلگٸلەپ الۋ كەرەك», - دەدٸ مامان.
«مۇزدىڭ قالىڭدىعىن اياقپەن تەۋٸپ تەكسەرۋگە قاتاڭ تىيىم سالىنادى! مۇزدىڭ بەرٸكتٸگٸن تەك سٷيمەن نەمەسە تاياق كٶمەگٸمەن تەكسەرۋگە بولادى. ەگەر بٸرٸنشٸ سوققىدان كەيٸن مۇز جارىلىپ, وعان سۋ پايدا بولسا, سٸز دەرەۋ توقتاپ, كەلگەن ٸزبەن ورالۋىڭىز كەرەك», - دەدٸ ەسەن بايىروۆ.
