Elordada karantin kezinde kedergisiz júrip-turý úshin bóten adamdarǵa jalǵan anyqtamalar bergen kásiporyndar anyqtaldy, dep habarlaidy "Ult aqparat".
«Elordada birqatar kásiporyndar Nur-Sultan qalasynda kedergisiz júrip-turý úshin jalǵan anyqtamalar jasaǵan. Kásiporyn basshylary olarda jumys istemeitin azamattarǵa da anyqtama bergen. Tártipbuzýshylyq faktilerin politsiia qyzmetkerleri planshettegi elektrondy baza arqyly tekserý kezinde anyqtady. Barlyq patrýldik qyzmetter planshettermen qamtylǵan. Tártipbuzýshylar endi jaýapkershilikke, tipti qylmystyq jaýapqa tartylýy múmkin», - delingen qala ákimdiginiń aqparatynda.
Aita keteiik, ótken aptada qalada karantin rejimin buzǵany úshin 800-den astam azamat ákimshilik jaýapkershilikke tartyldy, onyń 32-si qamaýǵa alyndy, qalǵandaryna aiyppul salyndy.
Nur-Sultan qalalyq Ákimshilik politsiia bastyǵy Eljan Shópekovtiń aitýynsha, karantin kezinde elordada bes myńǵa jýyq politsei qoǵamdyq tártipti qadaǵalaýda.
«Qala turǵyndarynyń kóbi tártipti buzyp jatqan joq. Alaida, politsiiany aldaýǵa tyrysatyn turǵyndarymyz da bar. Shaǵyn kásiporyn ieleri azamattar qala ishinde kedergisiz, erkin júrip-turýy úshin jumys ornynan jalǵan anyqtamalar bergen. Olar ákimshilik, tipti qylmystyq jaýapkershilikke tartylýy múmkin», – dep atap ótti E. Shópekov.
Sońǵy aptada aiyp turaǵyna 400-ge jýyq avtokólik jetkizildi, 500-den astam memlekettik nómir tárkilendi.
«Karantinniń birinshi kúninen bastap tártip buzǵany úshin ákimshilik jaýapkershilikke shamamen úsh myń adam tartyldy. Politsiia turǵyndardy karantin rejimin buzbaýǵa jáne qaýipsizdik sharalaryn saqtaýǵa shaqyrady. Ózińizdiń jáne jaqyndaryńyzdyń densaýlyǵyn oilańyz», - dedi Shópekov.
