Elorda málihatynyń depýtattary 7 mektepke qazaq ziialylarynyń esimin berý týraly sheshim qabyldap, respýblikalyq onomastikalyq komissiiaǵa usynys joldady, dep habarlaidy QazAqparat agenttigi.
Qalalyq máslihattyń kezekten tys sessiiasynda «Nur-Sultan qalasynyń keibir bilim berý uiymdaryna ataý berý týraly máselesi daýysqa salyndy.
Atalǵan másele boiynsha sheshim jobasyn máslihat depýtattaryna qalalyq tilderdi damytý jáne arhiv isi basqarmasynyń basshysy Sáken Esirkepov tanystyrdy.
Jobada elordadaǵy 7 bilim berý uiymyna qazaqtyń tanymal tulǵalarynyń esimin berý usynylǵan. Olar:
№11 mektep-litseige kórnekti memleket qairatkeri, ǵalym, etnograf Ózbekáli Jánibekovtiń esimin berý;
№60 mektep-gimnaziiaǵa arheolog, tarih ǵylymdarynyń doktory, belgili akademik Kemel Aqyshevtiń esimin berý;
№2 balalar mýzyka mektebine kúmis kómei ánshi, Qazaqstannyń halyq ártisi, Halyq qaharmany, keler jyly týǵanyna 100 jyl tolatyn Roza Baǵlanovanyń esimin berý;
№3 balalar mýzyka mektebine áigili opera ánshisi, pedagog, professor Ermek Serkebaevtyń esimin berý;
№66 mektep-litseige kórnekti memleket qairatkeri, Qazaqstandy shirek ǵasyrǵa jýyq ýaqyt basqarǵan Dinmuhamed Qonaevtyń esimin berý;
№83 mektep-gimnaziiaǵa qazaqtyń asa kórnekti aǵartýshy pedagogy, jazýshy, etnograf, folklorshy Ybyrai Altynsarinniń esimin berý;
№77 mektep-gimnaziiaǵa aqyn, halyq jazýshysy, jýrnalist, Qazaqstannyń eńbek sińirgen qairatkeri Fariza Ońǵarsynovanyń esimin berý.
«10 qarashada ótken Nur-Sultan qalasy onomastika komissiasynyń kezekti otyrysynda elordamyzdaǵy birqatar bilim berý uiymdaryna ataý berý jónindegi usynystar talqylanyp, qoldaý tapqan bolatyn. Osyǵan orai sizderdiń qaraýlaryńyzǵa «Nur-Sultan qalasynyń keibir bilim berý uiymdaryna ataý berý týraly» qala ákimdiginiń qaýlysy jáne qalalyq máslihattyń sheshim jobasy engizilip otyr. Kórsetilgen joba QR qoldanystaǵy zańnamasyna qaishy kelmeidi jáne normativtik-quqyqtyq aktilerge qoiylatyn talaptardy buzbaidy. Usynys qoldaý tapqan jaǵdaida ákimdik pen máslihattyń birlesken qaýlysy men sheshimi QR zańnamasynda belgilengen tártip boiynsha QR Úkimeti janyndaǵy respýblikalyq onomastika komissiiasynyń qaraýyna engiziledi», - dedi Sáken Esirkepov.
Máslihat depýtattary sheshim jobasyn biraýyzdan maquldap daýys berdi. Bul usynysty respýblikalyq onomastika komissiiasy maquldasa, tiisti Úkimet qaýlysy shyǵyp, elordadaǵy 7 mektep jańa ataýǵa ie bolady.
