Adam quqyqtary jónindegi ulttyq ortalyq qoǵamdyq kólikterge tekserý júrgizip, onyń qorytyndysyn jariialady, dep habarlaidy QazAqparat QR Adam quqyqtary jónindegi ýákil Asqar Shákirovke silteme jasap.
«Astana turǵyndary avtobýs validatorlarynyń kartadan eki ret tólem alatynyn, jolaýshylar kóp júretin ýaqytta kólik keptelisinen 60 minýtta ekinshi avtobýsqa tegin aýysyp minýge úlgermeitinderin aityp shaǵymdanǵan edi», - dep atap ótti A. Shákirov.
Onyń aitýynsha, validatorlardyń eki ret jolaqy alady degen turǵyndardyń kúdigi rastaldy.
«Adam quqyqtary jónindegi ulttyq ortalyqqa jáne baspasóz quraldaryna, áleýmettik jelige túsken shaǵymdarǵa saraptama jasaldy jáne ulttyq ortalyq qyzmetkerleri jekelegen avtobýs baǵyttaryna tekserý júrgizdi. Nátijesinde, Astana turǵyndarynyń kúdigi rastaldy», - dep málimdedi Asqar Shákirov.
Buǵan deiin jolaýshylar aldyńǵy esikten kirgendegi validator 180 teńge, al avtobýstardyń basqa validatorlary 90 teńge alatynyn aityp aryzdanǵan edi. «Astana LRT» ókilderi Kólik kartalarynan eki ret tólem alynýy múmkin emes dep jaýap berdi.
Differentsialdy tarif 2018 jyldyń 21 shildesinde óz kúshine endi. Jańa tártipke sáikes, tólemdi kartamen júzege asyrý kezinde jol aqysy ózgerissiz 90 teńge kóleminde qaldy. Budan bólek, kólik kartasyn paidalanýshylaryna arnalǵan basymdyq - birneshe kólikke aýysyp otyryp, tegin júrý quqyǵy saqtaldy. Aqshalai tólem kezinde qalalyq avtobýsta júrý quny - 180 teńge.
