Astana qalasynyń ákimi Baqyt Sultanov 1 jeltoqsan merekesi kúni bosanǵan analardy quttyqtady. Búgin elorda basshysy №2 kópbeiindi qalalyq aýrýhanada bolyp qaitty, dep habarlaidy "Ult aqparat".
Ákimdik aqparatyna sáikes, osy ýaqytta qala boiynsha 26 sábi dúnie esigin ashty, onyń 10 - er bala, 16 - qyz. Búgingi kúni jalpy sany 80 náreste dúniege keletini kútilýde. Jalpy, jyl saiyn orta eseppen 30 myń shaqalaq astanalyqtar qataryn tolyqtyrady.
Baqyt Sultanov bolǵan №2 kópbeiindi qalalyq aýrýhanada osy mezetke deiin 8 náreste týǵan, onyń beseýi er bala, úsheýi - qyz.
«Búgingi erekshe kúni dúniege kelgen sábiler de erekshe bolady degen senimdemiz. Biz úshin eń bastysy náresteler men analar densaýlyqtarynyń myqty bolýy. Mereke kúni dúniege kelgen jáne keletin barlyq sábige aman-saý bolýymen qatar, aitýly el azamaty bolyp ósýine tilektespiz», - dedi qala basshysy.
Quttyqtaýmen qatar, bosanǵan analarǵa ákimdik atynan alǵys hattar men gúl shoqtary, sábilerge arnalǵan arbalar, nárestege qajetti jiyntyqtar, balanyń kútimi boiynsha nusqaýlyqtar tabys etildi.
«Búgin otbasymyz úshin erekshe kún, kópten kútken qýanyshqa kenelýdemiz. Óitkeni, bul sábidi 3 jyl boiy kúttik. Shynymdy aitsam, bosanýymdy osy kúnge sáikes keledi dep oilamadym. Men úshin balany aman-saý dúniege ákelý mańyzdy boldy. Esimin áli tańdaǵan joqpyz, Elbasynyń esimin bereiik desek, joldasymnyń aty da Nursultan», - deidi jas ana Diana Ysqaqova.
Aita ketsek, №2 kópbeiindi qalalyq aýrýhanada jylyna shamamen 12 myń sábi dúniege keledi.
