Elorda ákimi Altai Kólginov áleýmettik mańyzy bar azyq-túlik baǵasyn turaqtandyrý jóninde keńes ótkizdi. Kezdesýge iri saýda jelileri men bazar ókilderi qatysty, dep habarlaidy "Ult aqparat" qala ákiminiń baspasóz qyzmetine silteme jasap.
Memleket basshysy Qasym-Jomart Toqaev áleýmettik mańyzy bar azyq-túlik taýarlarynyń baǵasyn baqylaýda ustaýdy tapsyrdy.
«Baǵany turaqtandyrý boiynsha 2 baǵytta jumys júrgizip jatyrmyz: turaqtandyrý qory quryldy, saýda jelilerin jeńildikpen nesielendirý boiynsha jumystar júrgizildi. «Ainalym shemasy» jobasyna «Magnum», «Astyqjan», «Kenmart», «Small», «Shapaǵat», «Evraziia», «Artem», «Big Shanhai» siiaqty saýda oryndary qatysady, sondai-aq et pen jarma boiynsha jetkizýshiler anyqtaldy. Kóterme saýda, deldaldar, kásipkerler jáne basqalar tarapynan «azyq-túlik sebetine» jatatyn taýarlarmen alypsatarlyq bolmaýy tiis. Osy baǵyttaǵy jumystar jalǵasyp jatyr. Baǵany turaqtandyrý máselesi memleket basshylyǵynyń baqylaýynda», - dedi qala ákimi Altai Kólginov.
Investitsiia jáne kásipkerlikti damytý basqarmasynyń basshysy Erlan Bekmurzaev dúrligýge sebep joq ekenin,azyq - túlik jetkilikti mólsherde baryn atap ótti.
Sondai-aq, elorda ákimdigi áleýmettik nan baǵasyn ustap turý máselesin qarastyrdy: turaqtandyrý qorynyń un qory tolyqtyrylyp, qalanyń naýbaihanalaryna qoldaý kórsetilip jatyr. Aýylsharýashylyq jármeńkelerin ótkizý baǵany ustap turýǵa jáne ónimdi naryqtyq baǵadan tómen satýǵa múmkindik beredi.
Aýylsharýashylyq jármeńkeleriniń maýsymy «Aspan bazar» saýda úiinde bastaldy, jármeńke ár senbi men jeksenbi kúnderi sáýir aiyna deiin ótedi.
