Nur-Sultan qalasynyń ákimi Altai Kólginov astanalyqtarǵa úndeý tastady, dep habarlaidy "Ult aqparat".
«Qurmetti elorda turǵyndary men qonaqtary! Biz tarihymyzda alǵashqy ret 3 aidan astam ýaqyttan beri karantin rejiminde ómir súrip kelemiz. Tótenshe jaǵdai kezeńin bastan keshirdik. Qatań tártiptiń arqasynda, ózin-ózi oqshaýlaýdyń nátijesinde biz qaýipti kezeńnen óttik. Qazirgi ýaqytta kóptegen kásiporyn jumysyn jandandyrdy. Azamattar jumysyna qaita oraldy. Qoǵamdyq kólikter qaita júrýdi bastady. Saiabaqtar men qoǵamdyq oryndar esigin qaita ashty. Árine osyǵan sáikes azamattardyń da sany kóshede kóbeidi», - deidi qala basshysy úndeýinde.
Degenmen, azamattardyń kóbeiýine bailanysty qaýip arta túsýde. Qala ákimi osyǵan bailanysty birneshe máselege kóńil aýdarýdy surady.
«Birinshi, qazir biz baiqaǵanymyzdai aýrý juqtyrý oshaqtary otbasylarynda paida bolýda. Mysaly, balalary, ata-anasy, ata-ájesi de virýsty juqtyrdy. Saldarynan búkil otbasy múshelerin aýrýhanaǵa jatqyzýǵa týra keldi. Ekinshi, kóńil aýdarýdy talap etetin másele bul ujymdarda oshaqtar paida bola bastady. Sońǵy aptadaǵy virýs anyqtalǵan azamattardyń teń jartysynan kóbi ol ujymdardaǵy azamattar. Otbasynda da jáne jumys orynynda da sanitarlyq normalardyń, karantinniń talaptarynyń durys saqtalmaýynyń esebinen dep mamandar aitady», - deidi ol.
Osy sebepti qala basshysy úsh máselege kóńil aýdarý kerektigin surady.
«Birinshiden, qoǵamdyq oryndarda, azamattar kóp shoǵyrlanatyn jerde mindetti túrde meditsinalyq maskany taǵý qajet. Ekinshiden, qarapaiym gigienalyq normalardy saqtaýdy umytpaýymyz qajet. Ásirese balalarǵa aityp, otbasymyz ben jumysymyzda da osy tártipti buzbaýymyz kerek. Úshinshiden, azamattar kóp shoǵyrlanatyn jerge barýdyń qajeti joq jáne de aralyqty saqtaýǵa mindettimiz. Tek sonda ǵana biz virýstan qutylamyz», - dep eskertedi Altai Kólginov.
Qala ákimi tájiribe kórsetkendei virýs jasqa qaramaitynyn eske saldy. Deni saý azamattar da virýsty juqtyryp, óz-ózin emdeimin dep densaýlyǵyn qiyndata túsýde. Jas, tepse temir úzetin azamattar aýrýhanaǵa túsip jatyr. Aýyr hálde jatqan azamattarymyz da bar.
«Eger 600-den astam aýrýhanada karantinde bolsa, sonyń teń jartysynan kóbinde pnevmoniia diagnozy anyqtalǵan. Demek, naǵyz qaýipti topqa jatatyndar. Sonyń ishinde 34 densaýlyǵy aýyr hálde dep baǵalanýda. Olardyń 12-si ókpeni jasandy jeldetý apparatyna qosylǵan. Karantin bastalǵaly beri, Tótenshe jaǵdai jariialanǵan kezde biz kóptegen mekemelerdi jabýǵa májbúr boldyq. Azamattarymyz ýaqytsha jumyssyz qaldy.
Soǵan qaramai memleketimiz qyrýar aqsha jumsady. Az qamtylǵan otbasylarǵa kómek kórsetildi. Orta jáne shaǵyn biznesqa úlken qoldaý kórsetildi. Endi qazir jumysty jandandyrǵannan keiin kásiporyn basshylary sony umytpaý kerek. Barlyǵymyz aitylǵan talaptardy oryndaýǵa tiistimiz. Biz kúndelikti qarap, baqylap júrmiz. Biraq, azamattyq, áleýmettik jaýapkershilik bolý kerek. Endigi ortaq mindetimiz — virýstyń taralýyna jol bermeý. Qatań tártipti saqtasaq, karantin rejiminen erterek ótemiz», - dep túidi Altai Kólginov.
