QR Bilim jáne ǵylym vitse-ministri bolǵan Elmira Sýhanberdievanyń isine qatysty jańa derekter shyqty. Oǵan ózine baǵynyshty adamdardan planshet pen uialy telefon talap etken degen aiyp taǵylyp otyr, dep habarlaidy QazAqparat tishisi.
«2019 jyldyń mamyrynda Sýhanberdieva mansabyn asyra paidalanyp, birneshe áreketterge barǵan. Qyzmet babyna sáikes, ol 1-maýsymda balalar quqyǵyn qorǵaý kúnine daiyndyqqa jaýapty bolǵan. Osy shara aiasynda QR Prezidenti men kópbalaly jáne az qamtylǵan otbasylardyń balalarynyń kezdesýi josparlanǵan», - dedi prokýror Nurlan Bekmaǵambetov sot zalynda.
Onyń aitýynsha Sýhanberdieva atalmysh kezdesýge qatysatyn balalarǵa planshet, aipad jáne smartfon siiaqty qymbat syilyqtar tabystamaq bolǵan.
«Sýhanberdieva QR Bilim jáne ǵylym ministrliginde bul maqsatqa qarajat qarastyrylmaǵanyn jaqsy bilgen. Aǵymdaǵy jyldyń 3 mamyrynda «Baldáýren» oqý-saýyqtyrý ortalyǵynda erlik jasaǵan balalardyń qatysýymen jas patriottar forýmy ótti. Osy shara barysynda ol eki balaǵa 1 maýsym kúni ministrmen kezdesý kezinde iPhoneH beriletinin aitqan. Sol úshin memlekettik mekeme basshysynan eki iPhoneH talap etken», - dedi memlekettik aiyptaýshy.
Prokýrordyń aitýynsha, Sýhanberdieva memlekettik mekeme basshysynyń atalǵan zattardy óz aqshasyna alýǵa májbúr bolatynyn bilgen.
«Kómekshisi men hatshysy arqyly aitylǵan bul tapsyrma ministrdiń buiryǵy retinde sipattalǵan. Mekeme direktory óz týysyna shyǵyp, kómek suraidy. Ol ótinishin oryndap, 636 myń teńgege eki uialy telefon satyp ápergen. Sýhanberdievaǵa ol zattar júrgizýshi arqyly jetken», - dedi Nurlan Bekmaǵambetov.
Prokýror atalmysh iske qatysty taǵy bir mysal keltirdi.
«1 maýsymdaǵy kezdesýlerge Prezident ákimshiliginiń maquldaýymen 41 bala bekitilgen. Olarǵa planshet alýǵa biýdjetten qarjy bólinbegenin bile tura, ózine baǵynyshty baspa basshylarynan 41 aifon talap etken», - dedi memlekettik aiyptaýshy.
Sýhanberdievanyń qorǵaýshysy Aigúl Ámrenova ol telefondardy aiyptalýshynyń ózi úshin suramaǵanyn alǵa tartty.
«Qurmetti sot, qorǵaýymdaǵy adamnyń tergeý isimen kelisimge kelý áreketin qoldaimyn. Onyń asyraýynda kámeletke tolmaǵan eki balasy bar ekenin eskere otyryp, aiyppul kólemin qysqartýyńyzdy suraimyn. Mekeme basshylaryna materialdyq shyǵyn shektirse de, ol qarjyny ózine almaǵanyn da eskerýińizdi ótinemin. Tergeý kezinde ol alǵan eki aifonnyń biri Atyraýdaǵy órtke oranǵan úiden qyzdardy qutqarǵan balaǵa, ekinshisi Nur-Sultandaǵy qudyqtan eki jasar sábidi qutqarǵan balaǵa berilgeni dáleldendi», - dedi qorǵaýshy.
Onyń sózine qaraǵanda, Elmira Sýhanberdieva balalarǵa aifon alyp berý týraly oiǵa «Baldáýren» ortalyǵyndaǵy kezdesýden keiin kelgen.
«Balalardan ne qalaityndaryn suraǵanda «aifon alǵymyz keledi» degen jaýaptar aitylǵan bolatyn. Iaǵni, ol bul jerde óz múddesin oilamaǵan. Al mektepke keler bolsaq, bul jerde de ol jeke basy eshqandai tabys kórmegen. Sondyqtan, aiyppul kólemin qysqartýyyzdy suraimyn», dedi qorǵaýshy.
Aita keteiik, Elmira Sýhanberdieva sybailas jemqorlyq kúdigimen ustaldy jáne 2 aiǵa qamaýǵa alyndy.
QR Sybailas jemqorlyqqa qarsy is-qimyl ulttyq biýrosy Elmira Sýhanberdievaǵa qatysty sotqa deiingi tergeý amaldaryn bastady. Búgin sot otyrysy ótip, ol óz kinásin moiyndady.
