Qazaqstandyq mánerlep syrǵanaýshy Elizabet Tursynbaeva sporttaǵy mansabyn aiaqtaǵanyn jariia etti, dep habarlaidy QazAqparat.
Elizabet Instagram-daǵy paraqshasynda sporttaǵy mansabyn aiaqtaýǵa jóninde sheshim qabyldaǵanyn jetkizgen. Mundai sheshim qabyldaýyna arqasynan alǵan jaraqaty sebep bolǵanyn aita kelip, ol uzaq ýaqyttan beri densaýlyǵyn mazalap júrgenin jasyrmaǵan.
«Osynyń saldarynan mamyr aiynyń sońyna deiin tolyqqandy jattyǵý jasaýǵa jaǵdai bolǵan joq. Men úshin ómirimniń belgili bóligin aiaqtaý arqyly jańa qadamdarǵa aiaq bastym dep sanaimyn. Men Qazaqstanda júrmin. Jyl sońyna deiin balalarǵa ózimniń úirengen tájiribemdi kórsetip, olardyń sheberligin arttyrýǵa kóńil bólmekpin. Men árqashan óz elimniń mánerlep syrǵanaý sportyn damytýdy josparlap keldim. Sol bir sát týdy dep sanaimyn», - dep jazdy sport sheberi.
Elizabet Tursynbaeva 2000 jyldyń 14 aqpanynda dúniege keldi. 2019 jyly álem chempionatynda kúmis júlde aldy.
Bul jóninde sportshynyń ákesi Baitaq Tursynbaev áleýmettik jelidegi paraqshasynda toqtalyp, «Osy oraida bizge qoldaý bildirgen Qyzylorda oblysy ákimdigine, Ulttyq Olimpiada komitetine, elimizdiń mádeniet jáne sport ministrligine úlken rizashylyǵymyzdy bildiremiz. Sondai-aq, Elizabettiń joǵary tabystarǵa qol jetkizýine úlken úles qosqan azamattarǵa alǵysymyzdy bildiremiz», - dep atap kórsetti.
Onyń aitýynsha, Elizabet 2011 jyldan beri elimizdiń ulttyq quramasy sapynda 51 jarysqa qatysty. Halyqaralyq saiystarda barlyǵy 39 medalǵa qol jetkizdi. Olardyń 17-i altyn.
Sońǵy on jyldaǵy sporttyq mansabynda Elizabet birde-bir halyqaralyq jarystardy qur jibergen joq. Degenmen keiingi jyly alǵan jaraqatynan ondai dodalarǵa bara almaǵan.
Elizabet álem tarihynda eresekter arasynda halyqaralyq jarystarda tórt ainalyp sekirýdi oryndaǵan alǵashqy mánerlep syrǵanaýshy retinde erekshelenedi. Qazaqstan úshin álem chempionatynda áielder arasynda alǵashqy sportshy retinde baǵalanady. Oǵan qosa ol tórt qurlyq chempionatynda, Aziia oiyndarynda, jasóspirimder arasyndaǵy Olimpiada oiyndarynda, Halyqaralyq ýniversiadada júldegerler qatarynan kórindi.
